Арманистон бош вазири Никол Пашинян ўз ватанида эканлигини ва ўз вазифаларини бажараётганини маълум қилди, деб ёзади «РБК». Унинг бу баёноти Қорабоғда тинчлик шартномаси имзоланганидан кейин юзага келган тартибсизликлар давом этаётган бир пайтда янгради.

«Мен, албатта, Арманистондаман ва бош вазирлик вазифамни тўла-тўкис бажаряпман», — деб ёзди у Facebook’да.

Маҳаллий вақт билан кечаси 2:30 атрофида Ереван кўчаларига юзлаб намойишчилар чиқиб, Арманистон ҳукумати биноси ёнида тўпланди ва қўриқчилар занжирини ёриб ўтиб, ичкарига бостириб кирди, деразаларни синдирди ва ички хоналарни ағдар-тўнтар қилди. Бино қўриқчилари «РБК»га маълум қилишича, бу пайтда бош вазир ичкарида бўлмаган. Намойиш иштирокчилари бош вазирга қарата ҳақоратлар айтиб, шундан сўнг унинг уйига қараб йўл олди. Норозилик акциялари чоғида Арманистон парламенти спикери дўппосланган.

Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.

Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.

Озарбайжон президенти Илҳом Алиев келишув ҳужжати имзоланишини «Арманистоннинг капитуляцияси (таслим бўлиши)» деб атади. Унинг сўзларига кўра, Боку ўзи учун манфаатли бўлган шартларда тинчликка эришган ва «барча мақсадлари»га етган.

«Гуллаб-яшнаётган Арманистон» мухолифатчи партияси Ереваннинг Қорабоғ бўйича келишувлардаги иштирокини бекор қилиш учун навбатдан ташқари парламент мажлисини чақириш нияти ҳақида маълум қилди.