Дания қишлоқ хўжалиги вазири Могенс Йенсен ноябрь ойининг бошида эълон қилинган ва мамлакатдаги барча қоракўзанларни ўлдириш ҳақидаги буйруқ хато эканлигини тан олди. Бу ҳақда «Ведомости» хабар берди.

Фото: «Ведомости»

Телевидение орқали чиқиш қилган вазир қоракўзан етиштириш билан шуғулланадиган фермерлардан узр сўраган ва бу хато учун жавобгарликни ўз зиммасига олган. Мамлакатдаги бача қоракўзанларни йўқ қилиш тўхтатилган.

Дания ҳукумати ноябрь ойининг бошида мамлакатдаги барча қоракўзанлар (уларнинг сони 15-17 миллионтани ташкил этади) мутацияга учраган коронавирус ҳайвонлардан одамларга ўтиш хавфи сабабли йўқ қилинишини эълон қилган. Бироқ маълум бўлишича, ҳайвонларни шошилинч йўқ қилиш ҳақида қарор қабул қилинган вақтда ҳукуматда уларни йўқ қилишни барча фермер хўжаликларидан талаб қилиш ваколати бўлмаган. Бундай талаб Дания конституциясига зид келган. Ҳайвонларни йўқ қилишни фақат касаллик қайд этилган фермалардан ва улардан саккиз километр радиусда жойлашган хўжаликлардан талаб қилиш қонуний бўлган бўларди. Акс ҳолда тегишли қонун ёки мамлакатда фавқулодда ҳолат режими жорий қилиниши керак бўларди.

Мухолифат партиялари мамлакат раҳбариятига мазкур қонун бузилишини кўрсатганда қишлоқ хўжалиги вазири дастлаб бундай талаб қўйиш ҳуқуқи бўлмаганини маълум қилган, бироқ ҳукумат вазиятни шунчалик жиддий деб ҳисоблагани сабабли тегишли қонун қабул қилинишини кутиш керакмаслигини тушунтирган.

Бир кун ўтгач вазир ўз баёнотини ўзгартирган ҳамда у фермерларга буйруқ эмас, балки тавсия берганини таъкидлаган. Мухолифат ва фермерлар бу баёнотдан ғазабланганда эса вазир Йенсен хатони тан олиб чиқди. «Биз хатога йўл қўйдик. Мен узр сўрайман. Мен ўз вазирлигимда юз бераётган барчаси учун жавобгарликни зиммамга оламан. Бошқача бўлиши ҳам мумкин эмас. Бироқ бу коронавирус шароитида Данияда қоракўзан етиштириш жиддий хатарга эга эканлигини рад этмайди», — дея маълум қилган вазир.

Дания бош вазири Метте Фредериксен депутатларнинг саволларига жавоб бериш чоғида вазир Йенсен бу масала бўйича парламент олдида ҳисобот беришини маълум қилган.

Аввалроқ Данияда қоракўзанлардаги коронавирус мутацияси сабаб одамларнинг кўчага чиқишига чекловлар белгилангани ҳақида хабар берилганди.