Озарбайжон томонга тажовуз уюштирилган тақдирда, расмий Боку Туркиянинг ҳарбий иштироки масаласини кўриб чиқишга тайёр, дея маълум қилди Озарбайжон президенти Илҳом Алиев BBC News нашрига берган интервьюсида. Бу ҳақда «Коммерсантъ» хабар берди.

Фото: «Коммерсантъ»

Озарбайжон президентининг сўзларига кўра, Туркия ва Озарбайжон ўртасидаги ёрдам ҳақидаги келишув худди Россия ва Арманистон ўртасидаги шундай келишувга ўхшайди.

«Мен можаронинг халқаро миқёсга чиқишига қарши эканлигимиз ҳақида бир неча марта гапирганман, биз барча мамлакатлардан, қўшни мамлакатлардан ва қўшни бўлмаган мамлакатлардан бу можародан узоқроқ туришни сўрадик. Биз халқаро даражада тан олинган ўз еримизда жанг қиляпмиз. Демак, бу бизнинг позициямиз. Мен ўйлайманки, ҳозир юз бераётган нарса давом этади. Шу сабабли Туркиянинг қандайдир ҳарбий иштирокига ҳеч қандай зарурат бўлмайди. Бироқ биз Туркия билан бир неча йил аввал тажовуз бўлган тақдирда, ҳарбий кўмакни ҳам назарда тутувчи ҳужжатни имзолаганмиз. Шундай қилиб, бизда Арманистон ва Россияда бўлгани каби озми-кўпми шундай ҳуқуқий асос бор. Шунинг учун агар Озарбайжон тажовузга дуч келса ва агар Озарбайжон Туркия ҳарбий ёрдамининг зарурлигини кўрса, биз бу вариантни кўриб чиқамиз», — дея маълум қилган Илҳом Алиев.

Тоғли Қорабоғдаги Озарбайжон ва Арманистон ўртасидаги можаро 27 сентябрдан бошлаб жиддий тус олди. Икки томон бир-бирини ўт очишда айбламоқда. Минтақада бир неча марта ўт очишни тўхтатиш режими ҳақида эълон қилинди, бироқ бу режим ҳар сафар бузилди. CNN Turk телеканалининг дипломатик манбаларига таяниб, 9 ноябрь куни хабар беришича, Туркия президенти Ражаб Тоййиб Эрдўғон Россия президенти Владимир Путинга минтақадаги муаммони ҳал қилиш учун қўшма ишчи гуруҳ тузишни таклиф қилган.

Эслатиб ўтамиз, 31 октябрь куни Россия Ташқи ишлар вазирлиги Арманистон бош вазири Никол Пашиняннинг Россия президенти Владимир Путинга қилган мурожаати муносабати билан агар тўқнашувлар тўғридан-тўғри Арманистон ҳудудига ўтказилса, Россия расмий Ереванга ёрдам беришини маълум қилганди.

Арманистон бош вазири Никол Пашинян Германиянинг ARD телеканалига берган интервьюсида Қорабоғ низоси ҳудудига бошқа мамлакатлардан эмас, Россиядан тинчликпарварларнинг киритилиши энг самаралиси бўлиши мумкинлигини айтган.

Озарбайжон президенти Илҳом Алиев Италиянинг La Repubblica газетасига берган интервьюсида Ереван босиб олинган ҳудудлардан ўз қўшинларини олиб чиқиб кетиш мажбуриятини зиммасига олса, Боку Тоғли Қорабоғдаги урушни тўхтатишга тайёр эканлигини маълум қилган.