Бухоро шаҳрида қўшнисининг уйидан 8,5 миллион сўмлик буюмларни ўғирлаган 17 ёшли қиз қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Бухоро шаҳар Ички ишлар органлари фаолиятини мувофиқлаштириш бошқармаси 3-сонли ички ишлар бўлимига Бухоро шаҳрида яшовчи 40 ёшли фуқаро Н.Н. уйида ўғрилик содир бўлгани ҳақида хабар берган.
Аниқланишича, номаълум шахс фуқаро Н.Н.нинг яшаш хонадонига ғайриқонуний равишда кириб, умумий баҳоси 8,5 миллион сўм бўлган бир дона Samsung J7 ва бир дона Samsung J6 русумли телефон аппаратлари, бир дона Toshiba русумли ноутбук, бир дона Аrtech русумли планшет, шиша вазалар, турли хилдаги ошхона анжомлари ва кийим-кечакларни ўғирлаб, воқеа жойидан яширинган.
«Мазкур ҳолат юзасидан тезкор равишда Жиноят кодексининг 169-моддаси (ўғрилик) билан жиноят иши қўзғатилди. Жиноят иши бўйича тезкор суриштирув ва тергов ҳаракатлари олиб борилди. Ҳудудий профилактика инспектори томонидан жиноятни содир қилган шахс бир неча соат ичида ашёвий далиллар билан қўлга олинди. Ўғри жабрланувчининг 17 ёшли қўшниси бўлганлиги маълум бўлди», — дейди Шуҳрат Жалолов.
Айни пайтда ўғрилик содир этган 17 ёшли Т.С. га нисбатан тергов ҳаракатлари олиб борилмоқда.
Изоҳ (0)