Андижон ҳамда Хоразм вилоятларида ҳуқуқ-тартибот идоралари ходимлари томонидан катта миқдордаги кўмир маҳсулотларининг талон-торож қилинишининг олди олинди. Бу ҳақда «Дарё»нинг ҳуқуқни муҳофаза қилувчи органлардаги манбаси хабар қилган.
Хабарга кўра Бош прокуратура ҳузуридаги департамент ҳамда ДХХнинг Шаҳрихон тумани бўлимлари томонидан ИИБ ходимлари билан ҳамкорликда ўтказилган тезкор тадбирда HOWO юк машинаси ҳайдовчиси З. ҳеч қандай ҳужжатсиз кўмир маҳсулотларини олиб кетаётганлиги аниқланган.
Ушбу ҳолат бўйича ўтказилган текширувда «Ўзбеккўмир» АЖнинг «Андижон кўмир етказувчи» филиали Шаҳрихон тумани омбори мансабдор шахслари аҳолига етказилиши лозим бўлган арзонлаштирилган 24,3 тонна кўмирни 12,1 миллион сўмга сотиб юборгани фош этилган.
Шунингдек, Бош прокуратура ҳузуридаги департаментнинг Хоразм вилоят бошқармаси томонидан ўтказилган тезкор тадбирда «Кўмир таъминот» МЧЖ Хоразм вилояти филиалига қарашли Янгиариқ туман кўмир омбори мудири Р.А. ва оператори Д.Ж. аҳолига етказилиши лозим бўлган арзонлаштирилган 38,9 тонна кўмирни 13,6 миллион сўмга вилоятдаги пишган ғишт ишлаб чиқарувчи корхонага сотган вақтида ашёвий далил билан ушланган.
Мазкур ҳолатлар бўйича Жиноят кодексининг 167-моддаси 2-қисми (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)