«Ўзкимёсаноат» акциядорлик жамияти томонидан Қашқадарё вилоятининг Деҳқонобод туманида жойлашган «Тепақўтон» калий тузлари конига пресс-тур ташкил этилди. Бу ҳақда «Дарё» мухбири Мусулмонбек Иброҳимов хабар берди.
Журналистлар 320 метр чуқурликдан «Тепақўтон» калийли тузлар тоғ-кон мажмуаси руда қазиб чиқариш билан танишди. Ундан сўнг маҳсулот ишлаб чиқариш ва қадоқлаш жараёни кўздан кечирилди.
Маълумот учун, «Деҳқонобод калий заводи» АЖнинг тоғ-кон мажмуаси қурилиши 2008 йилда «Тепақўтон» калий тузлари конини очиш ва тайёрлаш ишларидан бошланган ва дастлаб кон ишларини олиб бориш учун №1 ва №2 қия стволлар очилиб, руда қазиб чиқариш ишлари амалга ошириш учун панеллар тайёрланган.
«Тепақўтон» конида панелли қазиб олиш тизими йўлга қўйилган бўлиб, 2010 йил апрель—
май ойларидан силвинит рудасини қазиб чиқариш амалга ошириб келинмоқда. Корхонанинг ишга тушиши билан мамлакатимиз кимё саноатида янги турдаги калий хлорид минерал ўғити тўлиқ маҳаллийлаштирилди.
Бугунги кунга келиб корхона фаолият бошлаганидан буён экспорт қилинган маҳсулотнинг умумий миқдори 1,6 миллион тоннага етган. Ўзбекистонда ишлаб чиқарилган калий хлорид минерал ўғити Хитой, Қозоғистон, Тожикистон, Эрон, Ироқ, Бирлашган Араб Амирликлари, Вьетнам, Сингапур, Малайзия, Шри-Ланка, Озарбайжон, Грузия, Арманистон, Туркия, Молдавия, Украина ва Африка давлатларига экспорт қилинмоқда.
Жамиятнинг ишга туширилиши билан Ўзбекистон жаҳонда калий ўғити ишлаб чиқарувчи ўн олтинчи, Мустақил Давлатлар Ҳамдўстлигида эса учинчи мамлакат ҳисобланади. Айни пайтда барча турдаги минерал ўғитлар, яъни азот, фосфор, калийли ўғитлар ишлаб чиқарилмоқда.
Шунингдек, тадбир доирасида «Ўзкимёсаноат» АЖ бошқарув раиси корхонада фаолият юритаётган ёшлар билан учрашди. Жамият тизимида фаолият юритаётган ходимларнинг 9 минг нафаридан ортиғини ёшлар ташкил этади.
Изоҳ (0)