Buxoro shahrida qo‘shnisining uyidan 8,5 million so‘mlik buyumlarni o‘g‘irlagan 17 yoshli qiz qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Buxoro shahar Ichki ishlar organlari faoliyatini muvofiqlashtirish boshqarmasi 3-sonli ichki ishlar bo‘limiga Buxoro shahrida yashovchi 40 yoshli fuqaro N.N. uyida o‘g‘rilik sodir bo‘lgani haqida xabar bergan.
Aniqlanishicha, noma’lum shaxs fuqaro N.N.ning yashash xonadoniga g‘ayriqonuniy ravishda kirib, umumiy bahosi 8,5 million so‘m bo‘lgan bir dona Samsung J7 va bir dona Samsung J6 rusumli telefon apparatlari, bir dona Toshiba rusumli noutbuk, bir dona Artech rusumli planshet, shisha vazalar, turli xildagi oshxona anjomlari va kiyim-kechaklarni o‘g‘irlab, voqea joyidan yashiringan.
“Mazkur holat yuzasidan tezkor ravishda Jinoyat kodeksining 169-moddasi (o‘g‘rilik) bilan jinoyat ishi qo‘zg‘atildi. Jinoyat ishi bo‘yicha tezkor surishtiruv va tergov harakatlari olib borildi. Hududiy profilaktika inspektori tomonidan jinoyatni sodir qilgan shaxs bir necha soat ichida ashyoviy dalillar bilan qo‘lga olindi. O‘g‘ri jabrlanuvchining 17 yoshli qo‘shnisi bo‘lganligi ma’lum bo‘ldi”, — deydi Shuhrat Jalolov.
Ayni paytda o‘g‘rilik sodir etgan 17 yoshli T.S. ga nisbatan tergov harakatlari olib borilmoqda.
Izoh (0)