Савдо натижалари маълумотларига кўра, 3 ноябрь куни эрталаб олтин нархи деярли ўзгармайди — инвесторлар АҚШдаги президентлик сайловларидан янгиликларни кутиб, фаол савдолардан воз кечишни афзал кўрмоқда. Бу ҳақда «Прайм»га таяниб Spot хабар бермоқда.
Тошкент вақти билан 10:21 ҳолатига кўра, Нью-Йорк Comex фонд биржасида олтиннинг декабрь ойи фьючерслари нархи рамзий маънода 0,02 фоизга ёки 0,45 долларга — бир троя унцияси учун 1892,95 долларга ўсди. Кумушнинг декабрь ойи фьючерси 5 фоизга қимматлаб, унцияси 24,152 долларни ташкил этди.
Сешанба куни трейдерлар АҚШдаги сайлов участкаларидан янгиликларни кутиб эҳтиёткорлик қилмоқда. Президент сайловидаги рақиблар Оқ уйнинг амалдаги раҳбари, республикачи Дональд Трамп ва демократ Жо Байдендир.
Мавзуга доир: АҚШда президент сайловларида овоз бериш бошланди
«Айни пайтда кайфият қил устида… Сайловлар нимага олиб келишини ҳеч ким билмайди», — деган ОCBC иқтисодчиси Ҳоуи Ли Reuters агентлигига. Шу билан бирга, таҳлилчининг қайд этишича, сайловлар натижалари ноаниқлиги долларни қўллаб-қувватлайди ва қисқа муддатда олтинни пасайтиради.
ED&F Man Capital Markets таҳлилчиси Эдвард Мейр эса ўз навбатида АҚШ иқтисодиёти учун янги молиявий рағбатлантиришнинг етишмаслиги ҳам олтин нархига таъсир кўрсатишини таъкидлаган. Агар Трамп президентликка қайта сайланса, рағбатлантирувчи чоралар янги пакетини қабул қилиш кечикиши мумкин.
Аввалроқ Ўзбекистон банкларида қуйма олтин ёмбиларининг сотуви бошлангани хабар берилган эди. Оғирлиги 5, 10, 20 ва 50 грамм бўлган, 999,9 софликдаги олтиндан тайёрланган қуймалар махсус ҳимоя қадоқларида сотув учун тақдим этилади.
Изоҳ (0)