Арманистон бош вазири Никол Пашинян Россия президенти Владимир Путинга мурожаат қилиб, хавфсизликни таъминлашда ёрдам кўрсатиш бўйича консультацияни бошлашни илтимос қилди. Бу ҳақда Арманистон ТИВ матбуот хизматига таяниб, «Интерфакс» хабар берди.
«31 октябрь куни Арманистон бош вазири Никол Пашинян Россия Президенти Владимир Путинга мактуб йўллаб, Туркия—Озарбайжон томонидан Тоғли Қорабоғга қарши уюштирилаётган ҳарбий тажовузидан келиб чиқадиган вазият ва мавжуд муаммоларни батафсил баён қилди. Хусусан, мактубда Тоғли Қорабоғга қарши жанговар ҳаракатларни амалга ошириш учун Яқин Шарқдан хорижлик террорчиларнинг жалб этилаётгани қайд этилган», — дейилади ТИВ хабарида.
Маълум қилинишича, жанговар ҳаракатлар Арманистон чегарасига яқинлашиб келаётгани, Арманистон ҳудудига даъво қилинаётгани факти инобатга олиниб, бош вазир Россия президентидан 1997 йил 29 августда имзоланган «Дўстлик, ҳамкорлик ва ўзаро ёрдам кўрсатиш тўғрисида»ги битимининг 2-моддасида кўра ёрдам сўраган. Пашинян Путиндан Россия Арманистон хавфсизлигини таъминлашда кўрсатиши мумкин бўлган ёрдам турлари ва миқдорини аниқлаш учун шошилинч консультацияни бошлашни сўрагани айтилмоқда.
Аввалроқ Никол Пашинян Қорабоғга Россия тинчликпарварлари киритилишини ёқлаб чиққан эди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган учта уринишга қарамасдан, 27 сентябрдан буён давом этмоқда.
Изоҳ (0)