Armaniston bosh vaziri Nikol Pashinyan Rossiya prezidenti Vladimir Putinga murojaat qilib, xavfsizlikni ta’minlashda yordam ko‘rsatish bo‘yicha konsultatsiyani boshlashni iltimos qildi. Bu haqda Armaniston TIV matbuot xizmatiga tayanib, “Interfaks” xabar berdi.
“31-oktabr kuni Armaniston bosh vaziri Nikol Pashinyan Rossiya Prezidenti Vladimir Putinga maktub yo‘llab, Turkiya—Ozarbayjon tomonidan Tog‘li Qorabog‘ga qarshi uyushtirilayotgan harbiy tajovuzidan kelib chiqadigan vaziyat va mavjud muammolarni batafsil bayon qildi. Xususan, maktubda Tog‘li Qorabog‘ga qarshi jangovar harakatlarni amalga oshirish uchun Yaqin Sharqdan xorijlik terrorchilarning jalb etilayotgani qayd etilgan”, — deyiladi TIV xabarida.
Ma’lum qilinishicha, jangovar harakatlar Armaniston chegarasiga yaqinlashib kelayotgani, Armaniston hududiga da’vo qilinayotgani fakti inobatga olinib, bosh vazir Rossiya prezidentidan 1997-yil 29-avgustda imzolangan “Do‘stlik, hamkorlik va o‘zaro yordam ko‘rsatish to‘g‘risida”gi bitimining 2-moddasida ko‘ra yordam so‘ragan. Pashinyan Putindan Rossiya Armaniston xavfsizligini ta’minlashda ko‘rsatishi mumkin bo‘lgan yordam turlari va miqdorini aniqlash uchun shoshilinch konsultatsiyani boshlashni so‘ragani aytilmoqda.
Avvalroq Nikol Pashinyan Qorabog‘ga Rossiya tinchlikparvarlari kiritilishini yoqlab chiqqan edi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan uchta urinishga qaramasdan, 27-sentabrdan buyon davom etmoqda.
Izoh (0)