АҚШ президенти Дональд Трампнинг сайлов штаби сайти 27 октябрь куни кечқурун хакерлар ҳужумига учради, деб хабар бермоқда Meduza.

Фото: Facebook / The White House

Штаб матбуот котиби Тим Мертоу Twitter’да маълум қилишича, хакерлар махфий ахборотни қўлга кирита олмаган, чунки у аслида сайтда сақланмайди. Трампнинг жамоаси ҳужум манбасини аниқлаш учун ҳуқуқ-тартибот органлари билан иш олиб бормоқда.

The New York Times хабарига кўра, штаб сайти тахминан ярим соат давомида ишламаган. Бу пайтда бош саҳифада хакерлар хабари турган — унда улар бир нечта қурилмаларга ҳужум уюштиргани, бу «Трамп ва унинг қариндошларига тегишли маълумотларга тўлиқ йўл очиб бергани» ҳақида айтилади.

Хакерлар махфий маълумотни қўлга киритганини даъво қилди. Масалан, улар Трампнинг коронавирус пайдо бўлишига алоқадорлигида, шунингдек, сайловлар натижасига таъсир ўтказиш учун чет давлатлар билан тил бириктирганликда далил-исботсиз айблади.

Хакерлар Монеро криптовалютасини йиғиш учун иккита электрон ҳамён манзилини эълон қилди. Улардан бири махфий маълумотлар ошкор этилишини истовчилар учун, иккинчиси — аксинча, улар сир сақланиши тарафдори бўлганлар учун мўлжалланган. Хакерлар вақти келганда иккита суммани таққослаб, тўпланган маълумотлар тақдирини ҳал қилишга ваъда берди.

Аввалроқ Нидерландиялик киберхавфсизлик бўйича мутахассис, GDi Foundation нотижорат ташкилоти ҳамасосчиси Виктор Геверс АҚШ президенти Дональд Трампнинг паролини тахмин қилиб топиб, унинг Twitter’ига кира олганини маълум қилган эди.

Маълумот учун, АҚШда президент сайловлари 3 ноябрь куни бўлиб ўтади. Унда амалдаги президент Дональд Трамп ва демократлардан номзод, АҚШ собиқ вице-президенти Жо Байден қатнашади.

2016 йилда АҚШда сайловолди кампанияси чоғида хакерлар Демократик партия Миллий қўмитаси серверларига ва президентликка даъвогарлик қилаётган Ҳиллари Клинтоннинг электрон почтасига ҳужум уюштирган эди. Ҳужумда Россия Бош разведка бошқармасига алоқадор гуруҳни айблашган эди.