Наманганда вилоят озиқ-овқат захира жамғармаси ташкил этилиб, маҳаллий бюджетнинг қўшимча маблағлари ҳисобидан 10 миллиард сўм ўтказиб берилади. Бу ҳақда вилоят ҳокими Шавкатжон Абдураззоқов халқ депутатлари вилоят кенгашининг сессиясида маълум қилди, дея хабар беради «Дарё» мухбири Азизбек Абдувалиев.
Абдураззоқовга кўра, кейинчалик бу кўрсаткич 25 миллиард сўмга етказилади.
Жамғарманинг асосий вазифаси озиқ-овқат маҳсулотлари, биринчи галда гўшт, шакар, ўсимлик ёғи ва гурунчни маҳаллий ҳамда импорт қилувчи корхоналар орқали харид қилиш, жамғариш ва истеъмолга йўналтиришдан иборат бўлади.
Мазкур жамғарма маблағлари ҳисобидан биринчи босқичда 500 тонна гуруч, шунча тонна шакар ва ўсимлик ёғи захираси шакллантирилади. 500 бош қорамол харид қилинади, Қирғизистондан 1000 тонна картошка олиб келинади.
Вилоятдаги 14 та марказий деҳқон бозорида арзонлаштирилган нархларда савдо-сотиқ қиладиган «Элга хизмат» расталари ташкил этилади. Ҳар бир маҳаллада озиқ-овқат дўконлари ва кичик экобозорлар фаолияти йўлга қўйилади.
«Вилоятимизда аҳоли ихтиёрида 35 минг гектардан кўпроқ томорқа ерлари мавжуд. Бу вилоятда пахта экини учун ажратилган майдонларнинг тенг ярми дегани. Улардан 2020 йилда 1,1 миллион тонна, яъни ўтган йилга нисбатан 170 фоизга кўп ҳосил кутилмоқда. Бозорларимизда гўшт, сут павильонлари деярли йўқолиб кетди, уларни тиклашга алоҳида эътибор қаратамиз. Улгуржи, қоплаб сотадиган бозорларимиз йўқ, ваҳоланки, уларнинг мавжудлиги нарх-наво барқарорлигига жиддий таъсир кўрсатади. Ҳар бир маҳаллада кичик экобозорлар ташкил этилади, бу билан марказий бозорларга вақт ва маблағ сарфлаб қатнашга ҳожат қолмайди, — деди Шавкатжон Абдураззоқов.
Вилоят ҳокими сессия давомида журналист ва блогерларнинг аҳолини асосий турдаги озиқ-овқат маҳсулотлари билан кафолатли таъминлаш борасидаги кўплаб саволларига жавоб берди.
Изоҳ (0)