Саломатлик учун фойдали экани билан ҳар доим ҳам жисмоний тарбия билан шуғулланиш ёддан кўтарилиши ёки айрим сабабларга кўра бажарилмаслиги мумкин. Бундай вақтда қандай озиш мумкин?
Сабзавот истеъмол қилинг
Қориндаги ортиқча ёғдан халос бўлишни истасангиз, барра ёки парда пиширилган сабзавотлар истеъмол қилинг. Таркибидаги клетчатка ҳазм жараёни ва қондаги қанд миқдорининг меъёрда бўлиши учун фойдали бўлибгина қолмай, ошқозонни тўлдиради ва бунинг ҳисобига сиз камроқ истеъмол қиласиз.
Овқатланиш режимига риоя қилинг
Қачон қорнингиз очганида ёки пала-партиш овқатлансангиз, бел соҳасида ёғ тўпланаверади. Бунда организм стрессни ҳис қилади ва энергияни сарфлашдан кўра уни захира қилишни маъқул билади. Бундан ташқари, вақтида тановул қилмагандан кейин йўл-йўлакай зарарли таом ва маҳсулотларни истеъмол қилишга тўғри келиши, бу эса саломатлик учун хавфли бўлиши мумкин.
Ҳар куни сутли маҳсулотларни истеъмол қилинг
Қориндаги ёғнинг яна бир сабаби ичаклар фаол ишламаслиги бўлиши мумкин. Кўпинча бунга ҳазм жараёни ва метаболизмни яхшилайдиган фойдали бактериялар етишмаслиги сабаб бўлади. Фойдали бактерияларнинг кони эса сутли маҳсулотлар ҳисобланади ва шу сабаб ҳам уларни канда қилмаслик тавсия қилинади.
Смузи ва шарбатлардан воз кечинг
Парҳезшунослар аллақачон шарбатларни фойдали ва зарарсиз, деб ҳисобламай қўйган. Смузи ва шарбатни мунтазам истеъмол қилиш юрак қон-томир касалликлари ва ички аъзоларда ёғ тўпланиши хавфини оширади. Олма, апельсин бутунлигича ейилганда фруктоза билан бирга, саломатлик учун фойдали бўлган клетчатка, смузи ёки шарбат ичилганда эса фақат шакар истеъмол қилинади.
Спиртли ичимлик истеъмол қилманг
Спиртли ичимликлар таркибидаги калориялар семиришга сабаб бўлади. Шунингдек, унинг ҳатто оз миқдордаги истеъмолидан кейин ҳам моддалар алмашинуви секинлашади, ёғ энергияга айланмасдан, захира бўлиб тўпланади. Қолаверса, спиртли ичимлик қоринда ёғ тўпланишининг олдини олувчи ошқозон трактидаги фойдали бактерияларни йўқ қилади.
Кофеин миқдорини камайтиринг
Қаҳва — сийдик ҳайдаш хусусиятига эга ва у қанча кўп истеъмол қилинса, организмда суюқлик ва туз шунча кам ушланиб қолади, деган фикр хато. Кофеинни меъёрдан кўп истеъмол қилиш организмнинг сувсизланиши, ҳазм тизимининг ёмонлашиши, бунинг оқибатида метаболизм бузилиши ва қорин чиқишига сабаб бўлади.
Соядан воз кечинг
Соя дуккакларида семириш ва қорин шишига олиб келадиган кимёвий жиҳатдан эстроген гармонига ўхшаш бирикма бўлади. Шу сабабдан қайта ишланган, ферментланмаган соя — соя сути ва соя суви истеъмол қилишни камайтириш керак.
Уйқудан аввал ялпизли чой ичинг
Ялпиз — ошқозон ичак трактининг тинчланишига ёрдам берадиган ва шишининг олдини оладиган табиий маҳсулот. Ялпизли чой уйқудан аввал ичилганда асаб тизимини тинчлантирибгина қолмай, қорин киришига ҳам таъсир кўрсатади.
Изоҳ (0)