Таълим сифатини назорат қилиш давлат инспекцияси умумтаълим мактабларининг миллий рейтингини эълон қилди. Унга кўра, Бухоро, Наманган ва Хоразм вилояти мактаблари энг юқори кўрсаткичга эришган, Сирдарё, Тошкент ва Сурхондарё вилояти мактаблари эса энг паст натижа кўрсатган.

Фото: ЎзА

Қайд этилишича, рейтинг тузиш учун 2019 йил 3 октябрдан 18 декабргача барча туман ва шаҳарларнинг 992 та умумтаълим муассасаларида, 10 мингга яқин мактабнинг 10 фоизида назорат ишлари ва ижтимоий сўровномалар ўтказилган.

Маҳаллий ва халқаро тажрибалар, мутахассисларнинг фикр-мулоҳазалари асосида мактаблар рейтингини тузиш учун 4 та кўрсаткич асосий мезон сифатида қабул қилинган:

  • битирувчи ўқувчиларнинг (11-синф) умумтаълим фанлари бўйича таълимий тайёргарлик даражаси ва сифат кўрсаткичи (35 балл);
  • 9-синф ўқувчиларининг билим даражаси (25 балл);
  • олий ва биринчи тоифали ўқитувчилар улуши (20 балл);
  • умумтаълим муассасасининг ўқувчилари ва педагог жамоаси ўртасида ўтказиладиган сўровнома натижалари (20 балл).

Рейтинг индикаторларида жами натижанинг 60 фоизи ўқувчилар билим даражасини акс эттиради.

«Бу индикаторлар асосида 2020 йил 1 июль ҳолатига мактабларнинг рейтинг натижалари тайёрланди. Ҳудудлар рейтингида энг юқори ўринларни Бухоро, Наманган ва Хоразм вилоятлари эгаллаган бўлса, қуйи ўринларда Сирдарё, Тошкент ва Сурхондарё вилоятлари қайд этилди», — деб ёзмоқда Таълим инспекцияси.

Рейтингда 11-синф битирувчиларининг ўқишга кириш кўрсаткичлари бўйича Тошкент шаҳри (10,2 фоиз), Навоий (10,2 фоиз), Қорақалпоғистон Республикаси (10,4 фоиз), Фарғона (10,7 фоиз) ва Бухоро (16,5 фоиз) вилоятлари пешқадам бўлган.

«Бу йил 10 фоиз мактаб бўйича рейтинг тузилган бўлса, келаси йилларда оптик толали интернет тармоғига уланган мактаблар сони ошиб бориши ҳисобига замонавий ахборот коммуникацияларидан унумли фойдаланган ҳолда мазкур рейтингга 100 фоиз мактабларни қамраб олиш режалаштирилган», – дейилади Таълим инспекцияси хабарида.