Uzbekistan GTL заводини қураётган Enter Engineering компанияси Меҳнат кодексининг 161-моддасини қўпол равишда бузган. Бу ҳақда депутат Одилжон Тожиев ўз Telegram каналида маълум қилди.
«Ғузор туманидаги Uzbekistan GTL заводини қураётган Enter Engineering компаниясининг ишчиларга ойлик маош тўламасдан ишлатаётганлик ҳолати Меҳнат кодекси талабларини қўпол равишда бузишдир.
Ўзбекистон Республикаси Меҳнат кодексининг 161-моддасида ходимнинг меҳнатига ҳақ тўлаш ҳар ярим ойда бир мартадан кам бўлиши мумкин эмаслиги белгилаб қўйилган.
Вазиятнинг шу даражага етиб келишига компания раҳбарияти билан биргаликда меҳнат муҳофазаси бўйича ваколатли орган Бандлик ва меҳнат муносабатлари вазирлиги, Қашқадарё вилояти ҳокимлиги ва бошқа тегишли ташкилотларнинг назоратсизлик ҳамда бефарқликка йўл қўйгани ҳам сабаб бўлган деб ҳисоблаймиз.
Биз ушбу масала бўйича вазирлик ҳамда Қашқадарё вилояти ҳокимлигидан изоҳ сўрадик ва бугун кун якунига қадар муаммо ижобий ҳал этилиши ҳақида ахборот олдик. Қисқа вақт ичида Бандлик ва меҳнат муносабатлари вазирлиги ҳамда вилоят ҳокимлигига Олий Мажлис Қонунчилик палатаси депутатларига ҳисобот бериш вазифаси юклатилди.
Муаммо ҳал этилгунига қадар бу иш депутатлар назоратида бўлади» – деб ёзади Одилжон Тожиев.
Эслатиб ўтамиз, 21 октябрь куни ижтимоий тармоқлар ва Telegram каналларда Enter Engineering компаниясининг Қашқадарё вилояти Ғузор туманидаги объектларидан биридаги ишчиларнинг норозилиги акс этган видеоёзувлар тарқалди. Бунга изоҳ берган компания раҳбарияти ишчиларининг оммавий норозилигига нонушта ўз вақтида берилмагани сабаб бўлганини маълум қилди. Кейинчалик Энергетика вазирлиги Uzbekistan GTL’даги вазият барқарорлашганини, барча муаммо ва масалалар жойида ижобий ҳал этилганини хабар қилди.
Uzbekistan GTL заводи қурилишидаги ишчиларининг оммавий норозилигига уларнинг иш куни кўпайиб, дам олиш куни ўзгаришсиз қолгани ҳам сабаб бўлгани маълум қилинган. Завод ишчиси Ойбек Шербўтаевнинг маълум қилишича, авваллари улар 22 кун ишлаб 8 кун дам олган. Ҳозир эса 45 кун ишлатиб кейин уйга жавоб беришаётганини айтган.
«Дарё»нинг Telegram’даги манзилига шикоят йўллаган мурожаатчига кўра, завод ишчиларининг норозилигига ётоқхонада ишчилар учун жой йўқлиги, уч ойдан буён маош тўланмаётгани ва бошлиқлар ишчиларига қўпол муносабатда бўлаётгани ҳам сабаб бўлган.
Изоҳ (0)