«Ўзбекистон 24» телеканалининг жонли тарзда Тошкент шаҳридаги деҳқон бозорларида сотилаётган гўштларга бағишланган кўрсатувида пойтахт аҳолисидан бири гўштга катта суяклар қўшиб берилаётганини маълум қилди.
Юнусобод деҳқон бозоридан тайёрланган репортаж вақтида бошловчи қассобдан бугун қанча гўшт сотгани ҳақида сўраган. Бу вақтда харидорлардан бири журналистнинг ёнига яқинлашиб, бор ҳақиқатни «ошкор қилиб қўйган».
«Менга қаранглар, телевизорга оляпсизлар, тўғрисини олинглар. Мана бу гўштнинг ўзини сотмайди-ку… Мана бундай суяк қўшиб беряпти», — дейди мижоз қўллари билан ишора қилган ҳолда.
Аввалроқ Ўзбекистоннинг қайси бозорларида энг арзон гўшт сотилаётгани маълум қилинган эди.
Эслатиб ўтамиз, Шавкат Мирзиёев раислигида 16 октябрь куни озиқ-овқат хавфсизлигини таъминлаш ва ички бозорда нарх-наво барқарорлигини сақлаш чора-тадбирлари юзасидан видеоселектор йиғилиши ўтказилди. Унда гўшт, тухум, ўсимлик ёғи ва шакар нархининг кескин ўсиши аҳолининг норозилигига сабаб бўлаётгани таъкидланди. Президент барча озиқ-овқат маҳсулотларининг захираси бўлиши кераклигини, бу давлат сиёсатига айланиши лозимлигини таъкидлади. Шундан сўнг Тошкент шаҳрида гўшт нархига чеклов ўрнатилгани маълум бўлди.
Изоҳ (0)