Британиялик кўча рассоми Бэнксининг Show Me The Monet («Менга Монени кўрсат») картинаси Лондондаги аукционда 9,8 миллион долларга сотилди. Бу ҳақда замонавий санъат асари савдосини ташкиллаштирган Sotheby’s аукцион уйи ўзининг Twitter’даги саҳифаси орқали маълум қилди.

Фото: Twitter / Sotheby’s

Савдолар 21 октябрь куни бўлиб ўтган ва 8 дақиқа давом этган. Дастлаб картина 3,9-6,5 миллион доллар оралиғида баҳоланган.

Show Me The Monet — импрессионизм асосчиларидан бири ҳисобланувчи француз рассоми Клод Моне томонидан 1899 йилда яратилган «Япон кўприкчаси» полотносига ўхшатма. Бэнкси картинасида кўлга ташлаб кетилган супермаркет аравачаси тасвирланган.

Ушбу картина стрит-арт рассомининг энг қиммат асари эмас. 2019 йилнинг октябрида Бэнксининг Devolved Parliament картинаси 12 миллион долларга сотилиб, рекорд ўрнатганди. Буюк Британия Вакиллар палатасида депутатлар ўрнида маймунлар ўтиргани тасвирланган полотно дастлаб 1,9-2,5 миллион долларга баҳоланган эди.

Аввалроқ Бэнкси судда ўзини ошкор қилмагани учун энг таниқли асарларидан бирининг муаллифлик ҳуқуқидан маҳрум бўлган эди.