Арманистон бош вазири Никол Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтди. Бу ҳақда у «ТАСС» агентлигига берган интервьюсида айтиб ўтди, деб ёзади Tengrinews.

Фото: Reuters

Низо ҳудудига Яқин Шарқ, хусусан, Сурия ва Ливиядан жангариларнинг кўчириб ўтказилгани ҳақидаги хабарларга изоҳ берар экан, Пашинян ушбу элементлар Россия ҳудудига сизиб ўтишига ишонч билдирди.

«Мен учун шу нарса аниқ-равшанки, Тоғли Қорабоғда тор-мор қилинган гуруҳларнинг бир қисми ёки улардан алоҳида шахслар шунчаки Россияга кўчирилмоқда,чунки, улар Россияни худди Тоғли Қорабоғ ёки Арманистон каби душман деб билади. Масала бу жараён қандай давом этишида. Россия бу барча элементлар унинг ҳудудида тарқалишини ва у ерда россияликлар аксилтеррорчилик кампаниясини ёки аксилтеррорчилик ҳаракатларини олиб боришини кутадими? Мен билмайман, балки Россия ҳукуматида ёки махсус хизматларида аксилтеррорчилик операциясини ўз жойида, Тоғли Қорабоғдаёқ ўтказиш мумкинлиги муҳокама қилинаётгандир», — деди Пашинян.

Арманистон бош вазири эслатишича, Москва «суриялик жангарилар ва террорчилар хатти-ҳаракатлари унинг миллий хавфсизлигига бевосита хавф солгани учун Россиядан анча узоқда бўлган Сурияда аксилтеррорчилик ҳаракатларини олиб борган эди».

Энди эса унинг сўзларига кўра, жангарилар Россия чегарасига яқинроқ турибди. «Бу энди умуман бошқача вазият, ўйлайманки, Россияда ушбу вазиятга жавоб кўрсатиш учун қонуний ҳуқуқ ва асослар бор», — деди бош вазир.

Аввалроқ Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилганди.