Соғлиқни сақлаш вазирлиги Зангиота туманидаги юқумли касалликлар шифохонасида вафот этганларнинг қариндошлари муассаса эшиги олдида узоқ вақт кутиб қолаётгани тўғрисида интернетда тарқалган видео ва хабарларни изоҳлади. Республика патологик анатомия маркази директори, ССВ бош патологоанатоми, профессор Ражаббой Исроилов вазият юзасидан маълумот берган.

Фото: «Дарё»

«Зангиота туманидаги юқумли касалликлар шифохонасида патологик анатомия бўлими фаолияти 2020 йилнинг 1 августидан бошлаб ташкил этилган. Мазкур шифохонада вафот этганларнинг маййитини қариндошлари ушбу бўлимдан олиб кетиши мумкин. Бундан аввал маййит Республика патологик анатомия марказига олиб бориларди.

Соғлиқни сақлаш вазирлигининг 2020 йил 28 мартдаги «Коронавирус касаллиги билан рўйхатга олинган ёки гумон қилиниб, вафот этган беморлар жасадини дафн этишда хавфсизликни таъминлаш бўйича вақтинча қоидалар»ига асосан, жасад ўлим содир бўлган бўлимда 2 соат сақланиб, шундан сўнггина патологик анатомия бўлимига олиб келинади. Кейин рўйхатдан ўтказилиб, 3 фоизли хлорли эритмада зарарсизлантирилади, мурда диний эътиқодига кўра, ювилиб (кафанланиб ёки кийинтирилиб) қариндошларига топширилади. Табиийки, бу амалиётлар ўтказилиши учун ўртача 3-4 соат вақт талаб этилади. Бу вақтда қариндошлар муассаса эшиги тагида кутиб қолмоқда.

Шунингдек, видео ва хабарларда «Коронавирусдан вафот этган мурдаларни олиб кетишда навбат кутувчилар шунча бўлса, уларнинг сонини статистика нега кам беряпти?» деган мулоҳаза ҳам мавжуд.

Патологик анатомия бўлими эшиги олдида одам кўплигининг сабаби аслида битта мурдани олиб кетиш учун камида 4 нафар қариндоши келади, бу эса ўз-ўзидан фуқароларнинг ваҳимага тушишига сабаб бўлмоқда. Ўлим бўйича статистик маълумотларни сохталаштиришдан ҳеч ким манфаатдор эмас.

Зангиота туманидаги юқумли касалликлар шифохонасида нафақат коронавирус билан касалланганлар, балки бошқа турдаги ўткир инфекция ва пневмония билан оғриган беморлар ҳам даволанмоқда. Коронавирусдан вафот этганлар статистикасида фақат COVID-19 диагнози вирусологик текширувда тасдиқланганлар сони берилади, лекин бу шифохонада пневмония ва бошқа инфекцион касалликлардан ҳам вафот этаётганлар бор. Табиийки улар коронавирус статистикасига киритилмайди.

Ражаббой Исроилов

Фото: Соғлиқни сақлаш вазирлиги ахборот хизмати

Шунингдек, ушбу шифохонадаги патологоанатомик бўлими янада такомиллаштирилиб, кечки навбатчиликни ҳам ташкил қилиш ва тунги вақтларда маййитни қариндошларига топшириш имконини яратиш режалаштирилмоқда.

Зангиота шифохонаси атрофида тобут ташийдиган машиналар нархларни 700 минг сўмдан бошланади, деган хабарларга эса қуйидагича изоҳ бериш мумкин: Жасадларни етказиб бериш Соғлиқни сақлаш вазирлиги ва Республика патологик анатомия маркази зиммасида эмас. Зангиота туманидаги юқумли касалликлар шифохонаси дарвозаси олдида дафн этиш маросимини ташкил қилувчи хусусий ташкилотлар жасадни ташиб беришни таклиф қилмоқда. Уларнинг ўз хизматлари учун белгилаган нархларини назорат қилиш Соғлиқни сақлаш вазирлиги ва Республика патологик анатомия маркази ваколатига кирмайди», — деди Ражаббой Исроилов.

Эслатиб ўтамиз, 2020 йил 18 октябрда ижтимоий тармоқларда Зангиотадаги коронавирусга чалинган беморларни даволашга ихтисослаштирилган юқумли касалликлар шифохонаси дарвозаси олдида юзага келган навбат видеоси тарқалди, видеога илова қилинган матнда «шифохона ўликхонасидан маййитларни олиб кетиш қийин бўлиб қолган – одамлар қариндоши вафот этганлигини тасдиқловчи ҳужжатни олиб келиб ҳам соатлаб кутишга мажбур бўлмоқда, тобут ташийдиган машиналар эса нархларни 700 мингдан бошлаб кўтариб ташлаган»и қайд этилганди. Аввалроқ соғлиқни сақлаш вазири биринчи ўринбосари Абдуҳаким Ходжибаевнинг Зангиотадаги шифохонада ўтказган йиғилишининг аудиоёзуви тарқалиб кетган, унда амалдор «кислород босими тушиб кетаётгани учун» ушбу шифохонада «ҳар куни бир неча одам ўлаётгани»ни таъкидлаган.