Фарғона вилоятининг собиқ ҳокими Шуҳрат Ғаниев бош вазир ўринбосари лавозимига тайинлангани муносабати билан Олий Мажлис Сенати аъзолигидан чиқарилди. Бу ҳақда Марказий сайлов комиссияси хабар берди.
Марказий сайлов комиссияси қарорига кўра, Олий Мажлис Сенати аъзоси Шуҳрат Ғаниев Ўзбекистон Президентининг 2020 йил 24 сентябрдаги ПФ-6069-сон фармонига асосан Ўзбекистон бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимига тасдиқланганлиги муносабати билан у Олий Мажлис Сенати аъзолари рўйхатидан чиқарилган деб ҳисобланади.
Таъкидланишича, мазкур қарор Олий Мажлис Сенати ҳамда халқ депутатлари Фарғона вилояти кенгашига юборилган.
Шуҳрат Ғаниев 2011—2012 йилларда Фарғона вилояти ҳокими вазифасини бажарувчи бўлган, 2012 йилдан буён Фарғона вилояти ҳокими сифатида ишлаган.
Шуҳрат Ғаниев 2020 йил февралидан буён бош вазир ўринбосари лавозимида ишлаб, сентябрь ойида коронавирус оқибатида вафот этган Ўктам Барноев ўрнини эгаллаганди. 25 сентябрь куни Қонунчилик палатаси депутатлари бош вазирнинг аграр ва озиқ-овқат соҳаларини ривожлантириш масалалари бўйича ўринбосари лавозимига Шуҳрат Ғаниев номзодини маъқуллаган, 29 сентябрь куни эса Президент Шуҳрат Ғаниевни бош вазир ўринбосари лавозимига тасдиқлаганди.
Аввалроқ Шуҳрат Ғаниев коронавирус билан касаллангани тўғрисида хабар берилганди.
Изоҳ (0)