Россияда сўнгги суткада 13 868 кишида коронавирус аниқланди, деб хабар бермоқда «РБК», коронавирусга қарши курашиш тезкор штабига таяниб. Бу Россияда эпидемия бошланганидан буён кунлик касалланиш бўйича мутлақ рекорд кўрсаткич ҳисобланади.
Фото: «ТАСС»
Сутка давомида COVID-19’дан ўлим кўрсаткичи бўйича ҳам рекорд ўрнатилган — бир кеча кундузда 244 киши вафот этган. Аввалги рекорд 29 май куни қайд этилган, шу куни коронавирусдан вафот этганлар 232 нафарни ташкил қилган.
Хабарда айтилишича, сутка давомида аниқланган касалланишлар сони бўйича Москва (4618), Санкт-Петербург (557), Москва вилояти (420) ва Ростов вилояти (277) етакчилик қилмоқда.
Москва коронавирусдан ўлимлар сони бўйича ҳам биринчи ўринда. Россиядаги COVID-19 қурбонларининг чорак қисми айнан Москва шаҳрига тўғри келади (5687 киши). Бир ой ичида Москвада касалланиш ҳолатлари беш мартадан кўпроқ ўсди. Касалхоналарга энг оғир беморлар ётқизилмоқда.
Мамлакатда бутун эпидемия давомида 1 326 178 кишида коронавирус қайд этилган, уларнинг 22 966 нафари вафот этган. Ҳукумат катта шаҳарларда баҳордаги биринчи тўлқиндан сўнг захирага олиб қўйилган вақтинчалик касалхоналарни очишга қарор қилган.
