ЖССТ чекловларни бекор қилиш эвазига жамоавий иммунитетга эришиш ғоясини рад этди

Аҳоли орасида касалликнинг тарқалиши иммунитетга эга кишилар улуши етарли даражада кўп бўлган тақдирда тўхташи ҳақидаги тушунча вируснинг одамлар орасида эркин айланиб юришига эмас, балки оммавий эмлашга асосланган. Бу ҳақда Жаҳон соғлиқни сақлаш ташкилоти раҳбари Тедрос Гебрейесус брифинг чоғида айтиб ўтди, деб ёзади «РБК».

Жамоавий иммунитет ғояси шундан иборатки, аҳоли орасида етарлича кўп сонли одамлар иммунитет орттирган бўлса, инфекция тарқалиш каналларидан маҳрум бўлади. Шу сабабли касалликнинг авж олиши тўхтайди. Масалан, қизамиққа қарши жамоавий иммунитет ҳосил қилиш учун антитаначалар аҳолининг 95 фоизида, полиомиелитга қарши эса — 80 фоизида ишлаб чиқарилиши талаб этилади.

Мутахассислар фикрича, COVID-19 коронавирусининг тарқалиш коэффициенти чеклов чоралари мавжуд бўлмаган ҳолатда 2,5—3 ни ташкил қилади. Шу тариқа, агар тарқалиш коэффициенти 2,5 га тенг бўлса, ушбу формулага мувофиқ, жамоавий иммунитет ишлаб чиқарилиши учун аҳолининг 60 фоизи касал бўлиб ўтиши керак.

Гебрейесус таъкидлашича, ушбу концепция кўпчиликда вакцина ёрдамида иммунитетни ҳосил қилишга асосланган. Вируснинг эркин тарқалишига йўл қўйиб берилса, жамоавий иммунитетга эришиш мумкинлиги ҳақидаги ғоя ахлоққа ва илмий ёндашувга зиддир, деб ҳисоблайди ЖССТ раҳбари.

«Тарихда ҳали ҳеч қачон жамоавий иммунитет пандемия уёқда турсин, бирорта касалликнинг ҳам авж олишига қарши кураш стратегияси сифатида қўлланилмаган. Бу ҳам илмий ёндашув жиҳатидан, ҳам ахлоқий жиҳатдан муаммолидир», — деди ЖССТ раҳбари.

Бундан ташқари, Гебрейесус эслатишича, шифокорларда ҳозирча COVID-19’га нисбатан иммунитет ҳақида унчалик кўп маълумот йўқ. Масалан, касал бўлиб ўтган одамда иммунитет қанча вақт сақланиши ҳозирча аниқ эмас. Бундан ташқари, ҳатто ҳозир кўпчилик мамлакатларда жамоавий иммунитет даражасига етишгача анча бор — ўртача олганда касал бўлиб ўтганлар улуши 10 фоиздан камроқни ташкил этади.

Эслатиб ўтамиз, Нидерландияда коронавирусни қайта юқтириб олган аёл вафот этди, бу COVID-19 билан қайта касалланиш оқибатида юзага келган дунёдаги биринчи ўлимдир.