Ижтимоий тармоқларда, хусусан, журналист Хуршид Далиевнинг Twitter’даги саҳифасидаги постида Тошкент вилоятидаги Зангиота юқумли касалликлар шифохонасида электр таъминоти узилиб қолгани ва кислород концентраторига уланган беморларнинг кўпчилиги вафот этгани ҳақида хабарлар тарқалганди.
Фото: Соғлиқни сақлаш вазирлиги
Ўзбекистон Соғлиқни сақлаш вазирлиги мазкур хабарга муносабат билдириб, янги ва замонавий талабларга мослаб қурилган шифохонада бирорта ҳам ўлим қайд этилмагани, шифохонада электр узлуксизлигини таъминлаш мақсадида 3 та дизель генератори ўрнатилганини маълум қилган.
Кейинроқ Хуршид Далиев Зангиотадаги касалхонада электр токи ўчиб қолгани ростлигини, бироқ 300 киши вафот этгани нотўғри маълумот эканлигини ёзганди.
«Ҳудудий электр тармоқлари» АЖ матбуот хизматининг «Дарё»га маълум қилишича, юқорида қайд этиб ўтилган касалхонанинг электр энергия таъминоти уч томонлама, яъни Зангиота электр таъминоти корхонаси тасарруфидаги нимстанциясидан чиқувчи 6 кВли «Шифохона-1,2», 110/10 кВли «Истиқбол» ва «TMZ» нимстанцияларидан чиқувчи 10 кВли «Соғлом-1,2» ва «Шифохона-3,4» электр тармоқлари орқали таъминланади.
Шу билан бирга, мазкур касалхонанинг реанимация бўлимлари учун махсус UPS ва дизель электр манбайи ўрнатилган бўлиб, шифохонанинг электр таъминоти учун 24 соат навбатчилик ташкил этилган.
«Журналист Хуршид Далиев постида келтириб ўтган санасида мазкур ҳудудда электр энергиясида узилиш кузатилмаган. Бу ҳолатда касалхонада бирорта ўлим қайд этилмаганлигини шифохона маъмурияти ҳам тасдиқлади», — дея раддия билдирган «Ҳудудий электр тармоқлари» АЖ матбуот хизмати.
Эслатиб ўтамиз, 2020 йил 7 октябрь куни Гулистон шаҳридаги «Алпомиш» спорт мажмуасида ташкил этилган коронавирус беморларини саралаш ва тақсимлаш марказида портлаш юз берган, Фавқулодда вазиятлар вазирлиги портлаш мажмуадаги кислород баллони ёрилиши оқибатида содир бўлганини маълум қилганди. Портлаш юзасидан жиноят иши қўзғатилган ва ҳозирда тергов ҳаракатлари олиб борилмоқда. Портлаш кислород баллони ичидаги кислородга мой қолдиғининг аралашгани сабабли юз берган бўлиши мумкинлиги тахмин қилинмоқда.
