Қирғизистон президенти Сўронбай Жээнбеков мамлакатдаги вазиятни ҳуқуқий майдонга қайтаришни исташини ва бунинг учун барча «зарур қарорларни» имзолашга тайёр эканлигини айтди. Баёнот давлат раҳбари сайтида эълон қилинди, деб ёзади «РБК».

Фото: «ТАСС»

У давлатнинг яхлитлиги, халқнинг бирлиги ва жамиятнинг хотиржамлигини бирламчи деб атади ҳамда муайян шароитларда лавозимдан кетишга тайёрлигини қўшимча қилди.

«Жорий вазият яна қонуний ўзанига қайтиши, барча давлат тузилмалари ва ҳукумат қонуний мақомга эга бўлиши ва мамлакат тўғри йўлга тушиб олиши билан президент лавозимидан кетишга тайёрман», — деди у.

4 октябрь куни Қирғизистонда парламент сайловлари бўлиб ўтди — расмий натижаларга кўра, унда мамлакат президенти Сўронбай Жээнбековнинг оиласига ва бошқа нуфузли мансабдорларга яқин бўлган партиялар ғолиб бўлди. 5 октябрь куни мухолифат тарафдорлари кўчаларга чиқди — уларни куч вакиллари шафқатсизлик билан тарқатиб юборди. Аммо 6 октябрга ўтар кечасиёқ мухолифатчилар бир нечта маъмурий биноларни, шу жумладан, Оқ уйни эгаллаб олди. Натижада Марказий сайлов комиссияси сайловлар якунларини ҳақиқий эмас деб эълон қилди, бош вазир Кубатбек Бўронов истеъфо берди, аммо амалдаги президент ҳокимиятдан воз кечмади.