Қирғизистон пойтахти Бишкек шаҳрига ҳарбий бўлинмалар ва ҳарбий техника киритилмоқда. Тегишли фармон мамлакат президенти Сўронбой Жээнбеков томонидан имзоланди, деб ёзмоқда Meduza.
Фото: «Интерфакс»
Фармонда қайд этилишича, ҳарбийлар блокпостлар ташкил қилиш, қуролли тўқнашувларнинг олдини олиш, тартибни сақлаш ва тинч аҳолини ҳимоя қилиш билан шуғулланади.
Бишкекка ҳарбийлар фавқулодда ҳолат режими доирасида киритилмоқда. Фавқулодда ҳолат режими 9 октябрь куни соат 20:00 дан 21 октябрь соат 08:00 гача амалда бўлади.
Фавқулодда ҳолат режими амал қиладиган даврда Қирғизистон пойтахти қўмондони вазифасини ички ишлар вазирининг ўринбосари Алмазбек Ўрозалиев бажаради.
Қирғизистон Соғлиқни сақлаш вазирлигининг 9 октябрдаги маълумотларига кўра, Бишкекдаги намойишлар чоғида 1218 киши жароҳат олган, 200 нафардан ортиқ одам касалхонага ётқизилган.
Эслатиб ўтамиз, 5 октябрь куни Бишкекда ҳукуматни қўллаб-қувватловчи икки партия ғолиб чиққач, парламент сайловлари натижаларига қарши намойишлар бошланди. Тинч бошланган акциялар кечга бориб, ҳуқуқ-тартибот органлари билан тўқнашувларга айланиб кетди. Бир неча юз киши яраланди, бир киши вафот этди.
6 октябрь тонгида намойишчилар Қирғизистон парламенти ва президент маъмурияти жойлашган бинони эгаллади. Шундан сўнг намойишчилар Миллий хавфсизлик давлат қўмитаси биносига қараб йўл олди ва махсус хизмат ходимлари билан музокаралардан сўнг улар собиқ президент Алмазбек Атамбаевни ўтган йилдан буён ҳибсда сақланаётган МХДҚ тергов изоляторидан озод қилди. Колониядан, шунингдек, Атамбаев даврида ҳукуматни бошқарган собиқ бош вазир Сапар Исаков ҳам озод этилди.
Шу куни Марказий сайлов комиссияси парламент сайловлари натижаларини ҳақиқий эмас деб топди.
Норозилик намойишлари фонида Бишкек шаҳрига намойишчилар томонидан янги мер тайинланди. Аммо шаҳарнинг расмий раҳбари Азиз Суракматов истеъфо ҳақида ариза ёзмади. Президенти Сўронбай Жээнбеков содир бўлган воқеаларни ҳукуматни ноқонуний эгаллашга уриниш деб атади. Шунингдек, давлатнинг яхлитлиги, халқнинг бирлиги ва жамиятнинг хотиржамлигини бирламчи деб атаб, муайян шароитларда лавозимдан кетишга тайёрлигини билдирди.
9 октябрь куни Қирғизистон президенти ҳукумат ва бош вазирни истеъфога чиқарди.
