Озарбайжон вакиллари Эрон ҳудудига тасодифан ўт очгани учун узр сўради. Бу ҳақда Эрон ислом республикаси полицияси раҳбари ўринбосари Қосим Ризоий маълум қилди, деб ёзади «РБК».
Ризоийнинг таъкидлашича, Эронга бир нечта артиллерия снарядлари ва ракеталар келиб тушгач, чегарачилар низо томонларига расмий огоҳлантириш юборган. Унинг сўзларига кўра, Озарбайжон ва Арманистон ўз хатосини тан олиб узр сўраган. Икки мамлакат ҳарбийлари Эрон фермерларига ва чегарадош ҳудудлардаги бошқа аҳолига зарар етказмаслик учун ўқ узиш траекториясини тўғрилашга ҳам ваъда берган.
7 октябрь куни Эрон Боку ва Еревандаги ҳукуматларга норозилик ноталарини юборган. Бу ҳақда Эрон ТИВ вакили Саид Хатибзода маълум қилган.
«Биз иккала томонни ҳам Эрон суверенитетини ва ҳудудий яхлитлигини ҳурмат қилишга ва бундай номақбул ҳодисалар бошқа такрорланмаслиги учун зарур чораларни кўришга чақирамиз», — деди дипломат.
Шу билан бирга, аввалроқ Эрон мудофаа вазири бригада генерали Амир Ҳотамий бундай ҳолат қайталанса, Теҳрон огоҳлантиришлар билан чекланмаслиги ҳақида таҳдид қилган эди.
Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Бу минтақадаги сўнгги ўн йилликда кузатилган энг жиддий тўқнашув бўлмоқда.
Аввалроқ Россия, АҚШ ва Франция президентлари Владимир Путин, Дональд Трамп ва Эммануэль Макрон Тоғли Қорабоғ ҳудудида давом этаётган жанговар ҳаракатларни зудлик билан тўхтатишни талаб қилганди.
Энди эса Европада хавфсизлик ва ҳамкорлик ташкилотининг Минск гуруҳи ҳамраислари — Россия, АҚШ ва Франция яқин кунларда Тоғли Қорабоғдаги низони ҳал қилиш бўйича музокаралар ўтказиши маълум бўлди.
Изоҳ (0)