Гўзаллик бир стандарт асосида бўлмаслигини исботлайдиган турли кўринишга эга аёллар (фото)

Гўзаллик абстракт тушунча ва ҳар бир халқ у ҳақида ўзига хос тасаввурга эга. Сиз-у бизга ноодатий кўринган ташқи кўринишдаги айрим жиҳатлар маҳаллий аҳоли учун гўзаллик саналиши мумкин. Қуйидаги турли миллатга мансуб аёл ва қизлар суратларига қараб гўзалликнинг стандарти ва қолипи йўқ эканига амин бўлиш мумкин.

Химба аёллари

Намибияда яшайдиган Химба аёлларининг соч турмаги, тери ранги ва тақинчоқлари анъанага кўра муҳим аҳамиятга эга ҳисобланади. Сув етишмаслиги сабаб қиз ва аёллар гигиеник муолажа сифатида тутунли ваннадан, мафтункорлик учун эса тери ва соч учун махсус ниқобдан фойдаланади. Тақинчоқ сифатида аёллар қўлига ва оёғига браслет, бўйнига эса чокер тақади.

Махараштра штати аёллари (Ҳиндистон)

Ҳинд миллати вакилини минглаб аёллар орасидан таниб олиш мумкин. Ҳиндлар нигоҳлари янада чиройли кўриниши учун табиий сурмадан фойдаланади. Уларнинг яна бир ўзига хослиги бурнига тақинчоқ «натх» тақади ва бу маданиятнинг бир бўлаги ҳисобланади. Одатга кўра қиз жисмоний вояга етганидан кейингина бурнига «натх» тақиши мумкин бўлади ва бу унинг турмушга чиқиши мумкинлигини билдиради.

Уганда аёллари

Угандада ҳам бошқа Африка мамлакатларидагидек тўладан келган аёллар гўзал ҳисобланади. 2019 йилда тўла аёллар ўртасида гўзаллик танлови ҳам ўтказилган. Маҳаллий аёллар қават-қават маржон, ёғочдан ишланган браслет ва металл зирак тақишни хуш кўради.

Бали аёллари

Бали оролларида яшайдиган аёлларга келишган сарв қомат хос ҳисобланади. Бундай натижага улар кундалик жисмоний фаолиятни амалга ошириш орқали эришган. Аёллар оғирроқ буюмни бошига қўйиб қўллари билан ушлайди ва мушаклар мунтазам тонусда бўлади. Орол аёллари паст бўй, қора соч ва ёқимли табассум эгаси ҳисобланади.

Масаи аёллари

Кенияда ва Танзанияда яшайдиган аёллар дунёга келиши билан қулоқлари тешилади ва турли тақинчоқ ва безаклар (ҳайвон шохлари) тақилади. Шунингдек, латофатлироқ кўриниш учун сочлари калталанади ёки олиб ташланади.

Яманлик аёллар

Яманда аёллар камдан-кам ҳолларда юзини очиб юради ва кўпинча фақатгина кўзларини кўриш мумкин бўлади. Шу сабаб ҳам уларга ўтли нигоҳ хос саналади. Яшаш жойига қараб аёллар кўриниши фарқ қилиши мумкин. Масалан, мамлакат шимолидаги аёллар тери ва кўзлари ранги очроқ жанубдагиларда эса тери ва кўз ранги тўқроқ бўлади.

Афар аёллари

Афар аёллари ҳам анъаналарини сақлаб қолишга ҳаракат қилади. Аёллар сочини майда қилиб ўраб, бисер ёки мунчоқлардан тақинчоқ ёки аксессуарлар тақади. Улардан айримларининг юзида келиб чиқиши ва ижтимоий статусни билдирадиган татуриовкани кўриш мумкин.

Непаллик аёллар

Ҳиндистон билан қўшни эканига қарамай Непаллик аёлларнинг кўриниши ҳиндларникидан фарқ қилади. Уларнинг тери ранги очроқ ва кўзлари бошқачароқ бўлади. Анъанага кўра Непалда ҳам тўладан келган аёллар қадрланади. Ёшроқ авлодлар мазкур стандартни инкор қилишига қарамай, катта ёшдагилар ўз қарашларига содиқ ҳисобланади.

Тибетлик аёллари

Тибетлик аёллар нафақат гўзаллиги балки саломатлиги билан ҳам бошқалардан фарқ қилади. Бутун дунёга машҳур бўлган Тибет тиббиёти маҳаллий қиз ва аёлларнинг тишлари оқ, сочлари соғлом ва териси тиниқ бўлишига ёрдам беради. Аёллар томонидан тилла, кумуш ва тошлардан ясалган тақинчоқ тақилади.

Боливия аёллари

Боливия аёллари жозибали табассуми ва ўзига хос либослари билан машҳур. Ҳатто кундалик турмушда ҳам маҳаллий аёллар миллий либослар — шляпа, қават-қават юпка, ва манта деб номланган ёпқич кийишни афзал билади. Аёллар сочини қалин қилиб ўраши унга мех ва мунчоқли тақинчоқ тақишига гувоҳ бўлиш мумкин.