Мадриднинг «Реал» клуби ёзги трансферлар ойнасида харид амалга оширмади.
АS хабарига кўра, бунақаси «Қироллик клуби» билан 40 йил деганда илк бор кузатилди. Сўнгги бор мадридликлар 1980 йилнинг ёзида трансферларга қўл урмаганди.
2020 йилнинг ёзида Мадрид шаҳри клуби фақат ижарадан қайтган футболчилари орқали таркибни кучайтирди. Булар: дарвозабон Андрей Лунин, ҳимоячи Альваро Одриосола ва ярим ҳимоячи Мартин Эдегор.
Европада ёзги трансферлар ойнаси Марказий Европа вақти билан 5 октябрдан 6 октябрга ўтар кечаси 00:00 да ёпилди. «Реал» бу вақтга қадар ҳеч қандай харид амалга оширмади.
Шу билан бирга «Реал» бир қатор футболчилари билан хайрлашди. Хамес Родригес («Эвертон») ва Ашраф Ҳакими («Интер») сотиб юборилган бўлса, Гарет Бэйл («Тоттенҳэм»), Такуфуса Кубо («Вильярреал»), Борха Майораль («Рома») ва Дани Себальос («Арсенал») ижара асосида жамоани тарк этди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)