Ўзбекистон раҳбарияти академик Тўра Мирзаевнинг вафоти муносабати билан ҳамдардлик билдирди

Ўзбекистон Республикаси Фанлар академияси академиги, адабиётшунос олим Тўра Мирзаев 29 сентябрь куни 84 ёшида вафот этгани ҳақида хабар берилганди. Ўзбекистон Президенти Шавкат Мирзиёев, Сенат раиси Танзила Норбоева, Қонунчилик палатаси раиси Нурдинжон Исмоилов, бош вазир Абдулла Арипов, Фанлар академияси президенти Беҳзод Йўлдошев адабиётшунос олимнинг вафоти муносабати билан ўз ҳамдардлигини билдирди. Бу ҳақда ЎзА хабар берди.

Тўра Мирзаев 1936 йил 6 мартда Бухоро вилоятининг Шофиркон туманида туғилган. У 1957 йилда Бухоро давлат педагогика институтини тугатиб, меҳнат фаолиятини Сурхондарё вилоятининг Жарқўрғон туманидаги 22-ўрта мактабда ўқитувчи сифатида бошлаган. Тўра Мирзаев 1961—1963 йилларда Ўзбекистон Фанлар академияси Тил ва адабиёт институти аспирантурасида таҳсил олган, 1965 йилда номзодлик, 1986 йилда докторлик диссертациясини ҳимоя қилган. У 2017 йилда Ўзбекистон Республикаси Фанлар академиясининг ҳақиқий аъзоси этиб сайланган.

Истеъдодли олим ўзининг қарийб 65 йиллик илмий-педагогик ва ташкилотчилик фаолияти давомида Фанлар академияси Тил ва адабиёт институти катта илмий ходими, сектор мудири, директори, Фанлар академиясининг ижтимоий-гуманитар фанлар бўйича вице-президенти, Ўзбек тили, адабиёти ва фолклори институтининг етакчи илмий ходими каби лавозимларда самарали меҳнат қилган, Ўзбекистонда адабиётшунослик, фолклоршунослик фанлари соҳасидаги долзарб масалаларни тадқиқ этиш, юқори малакали кадрлар тайёрлашга муносиб ҳисса қўшган.

Академик ўзбек халқ оғзаки бадиий ижодиётини кенг кўламда тадқиқ этиш борасида илмий мактаб яратган, эпосшуносликнинг назарий ва амалий масалаларига доир кўплаб асарлари нафақат мамлакат, балки чет элларда ҳам эътироф этилган таниқли фолклоршунос олим эди.

Айниқса, унинг раҳбарлиги ва иштирокида тайёрланган 15 жилдлик «Ўзбек фолклори ва адабиёти тарихи» илмий-амалий тўплами, «Алпомиш» достони, «Ўзбек халқ мақоллари»нинг академик нашрлари, шунингдек, олимнинг кўп жилдлик «Ўзбек халқ ижоди», «Ўзбек фолклори очерклари», «Ўзбек халқ ижоди бўйича тадқиқотлар» каби китоблари, кўплаб илмий мақолалари, китоб ва монографиялари миллий адабиёт ва маданият хазинасига муносиб ҳисса бўлиб қўшилган.

Жонкуяр устоз сифатида кўплаб ёшларга илм-фан сирларидан сабоқ берган заҳматкаш олимнинг бевосита раҳбарлигида ўнлаб фан докторлари ва фан номзодлари тайёрланган.

Академик Тўра Мирзаевнинг Ўзбекистон илм-фанини ривожлантириш борасидаги хизматлари давлат томонидан муносиб тақдирланган. У Беруний номидаги Ўзбекистон Республикаси Давлат мукофоти, «Ўзбекистон Республикаси фан арбоби» фахрий унвони, «Фидокорона хизматлари учун» ва «Дўстлик» орденларига сазовор бўлган.

Эслатиб ўтамиз, фалсафа, адабиёт ва педагогика фанлари бўйича таниқли олим, Ўзбекистон Фанлар академиясининг академиги Жуманазар Базарбаев 25 сентябрь куни 87 ёшида вафот этганди. Тиббиёт фанлари доктори, профессор Назира Салоҳова 77 ёшида вафот этгани ҳақида ҳам хабар берилганди.