Миллий оммавий ахборот воситаларини қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов 1 октябрь — Ўқитувчи ва мураббийлар куни муносабати билан ОАВ ва журналистика соҳаси вакилларини етиштириб чиқараётган устозларни байрам билан табриклади.
Комил Алламжоновнинг қайд этишича, матбуот соҳасида қабул қилинган ҳар қандай қонун, журналист ва блогерларни ҳуқуқий томондан янада чиниқтиради. Бу касб эгаларига жазо қанчалик оғир бўлса, шунчалик хато қилмасликка ҳаракат қилади, ўз устида ишлайди.
Чўлпон, Абдулла Қодирийлар яшаган даврларда ижодкорларга ўлим (отув) жазоси билан ҳам таҳдид қилинган. Бу билан нима, улар ижодни тўхтатиб қўйганми? Йўқ!!! Улар яширинча ижод қилаверган. Ҳозир ҳам худди шундай.Жазо қанча оғирлашса ҳам, журналист ёки блогер ёзишни барибир тўхтатмайди. У анонимга айланади ёки қонунларни бузмайдиган мустаҳкам асосланган ҳақиқатни ёзади.
Ёзаверади, ёзаверади, қонунни бузмаган ҳолда ёзаверади. Чунки бу соҳа вакиллари анча зийрак, зукко ва кўпроқ ватанпарвар бўлади. Ўз жонини гаровга қўйиб бўлса-да, ёзаверадиган ҳамкасбларимиз бор.
Кеча Президентимиз айтганларидек, ҳурматли мутасадди ходимлар, матбуот билан ишлашни ўрганмас экан, фақат ўзига зарар бўлаверади. Матбуот билан курашиш эмас, улар билан ишлаш керак. Хоҳлаган ишни қиладиган давр ўтди.
Информацияни беркитиб бўлмасликни тушунадиган пайт аллақачон келган. Ҳозир ҳар бир смартфон эгаси блогер бўлиши мумкин. Белгиланган қонунларга асосланиб ҳам.
Биз кучли фуқаролик жамияти барпо этяпмиз. Жуда катта ғилдирак жойидан қўзғалган. Энди орқага йўл ҳақиқатан ҳам йўқ. Замон талаби ҳам фақат шу! Адолатпарвар ижодкорларни яратган устозларга таъзим.
Байрамингиз муборак!
Комил Алламжонов, Миллий оммавий ахборот воситаларини қўллаб-қувватлаш ва ривожлантириш жамоат фонди Васийлик кенгаши раиси
Изоҳ (0)