Ўзбекистон бош вазири Абдулла Арипов бошчилигидаги ҳукумат делегацияси Савдо-иқтисодий ҳамкорлик бўйича ҳукуматлараро комиссиянинг 7-йиғилишида иштирок этиш учун 2020 йил 29 сентябрь куни Тожикистон пойтахти Душанбе шаҳрига ташриф буюради. Бу ҳақда Бош вазир матбуот хизмати хабар берди.
Маълум қилинишича, комиссия кун тартибида савдо-иқтисодий, транспорт-коммуникация, энергетика, қишлоқ ва сув хўжалиги ҳамда маданий-гуманитар соҳаларда ва бошқа устувор йўналишларда икки томонлама амалий ҳамкорликни кенгайтиришнинг долзарб масалалари муҳокама қилиш назарда тутилмоқда.
Ташриф доирасида Ўзбекистон—Тожикистон ишбилармон доиралари вакиллари ўртасида бизнес-форум ва Ишбилармонлар кенгашининг йиғилишини ўтказиш режалаштирилган.
Ўзбекистон бош вазири Абдулла Арипов бошчилигидаги делегация Тожикистонда бўлиши ҳақида аввалроқ хабар берилганди. Ташриф давомида Душанбе шаҳрида ўтадиган бизнес-форумда Тожикистон ва Ўзбекистон бизнес ҳамжамиятининг 700 дан ортиқ вакиллари, икки мамлакат бош вазирлари Қоҳир Расулзода ва Абдулла Арипов иштирок этиши кутилмоқда.
Аввалроқ Ўзбекистон ва Тожикистон транспорт соҳаси идоралари раҳбарлари ўртасида бўлиб ўтган учрашувда икки томонлама ҳамкорликни мустаҳкамлаш, шу жумладан, янги автотранспорт йўналишларини очиш масаласи муҳокама қилинганди.
