Фарғона вилоятини Андижон вилояти билан боғловчи Қува—Асака, Шаҳрихон—Қува йўлларидаги блокпостлар олиб ташланди.

Фото: Қува тумани ҳокимлиги ахборот хизмати

Қува туман ҳокимлиги ахборот хизматининг «Дарё»га маълум қилишича, Асака ва Қува туманларининг чегара ҳудудига яқин бўлган йўлнинг еттинчи километри, Шаҳрихон—Қува йўлининг бешинчи километрида амалга оширилаётган таъмирлаш ишлари якунланган. Шу сабаб бугун 26 сентябрдан ҳар икки йўлда транспортлар чекловларсиз ҳаракатланишни бошлаган.

Фото: Қува тумани ҳокимлиги ахборот хизмати

Эслатиб ўтамиз, Ўзбекистонда 2020 йил 15 августдан карантин чекловлари юмшатилиб, шахсий ва жамоат транспорти ҳаракати қайта тикланган бўлса-да, шу кунгача Андижон ва Фарғона вилоятлари ўртасида транспорт қатновлари чекланганича қолаётган эди. Асака ва Қува туманларидан ўтувчи асосий йўл ва Шаҳрихон—Қува йўли блокпост билан беркитилганди.

Фото: Қува тумани ҳокимлиги ахборот хизмати

Андижон аҳолиси Фарғонага ўтиш учун ёки фарғоналиклар Андижонга бориш учун Ўш—Тошкент йўли билан Бўстон—Ёзёвон пости орқали 130 километр ортиқча йўл юришга мажбур бўлаётган эди.

25 сентябрь куни Наманган вилояти ҳокими Хайрулло Бозоров Фарғона вилояти ҳокими вазифасини бажарувчи этиб тайинлангани ҳақида хабар берилган эди.

2011 йилдан буён Фарғона вилоятига раҳбарлик қилиб келаётган Шуҳрат Ғаниев эса Ўзбекистон бош вазирининг аграр ва озиқ-овқат соҳаларини ривожлантириш масалалари бўйича ўринбосари лавозимини эгаллаганди.