«Қашқадарёда мажбурий меҳнат кузатилмади, аммо теримчиларга яратилган шарт-шароитни зўр деб бўлмайди». Республика ишчи гуруҳи дастлабки хулосаларини маълум қилди

Қашқадарё вилоятининг Қарши, Ғузор ва Нишон туманларидаги пахта терим жараёнлари ўрганилганда мажбурий меҳнат ва вояга етмаганларни теримга жалб қилиш ҳолати кузатилмаган. Бу ҳақда Қарши шаҳридаги Журналистлар уйида Олий Мажлис Сенатининг Суд-ҳуқуқ масалалари ва коррупцияга қарши курашиш қўмитаси раиси ўринбосари Шуҳрат Чўллиев иштирокидаги матбуот анжуманида маълум қилинди, дея хабар берди «Дарё» мухбири.

Маълум бўлишича, Қашқадарёда фақатгина Олий Мажлис Сенатига ахборот берувчи 8 кишидан иборат ишчи гуруҳ тузилган бўлиб, ишчи гуруҳ аъзолари вилоятда мажбурий меҳнатга йўл қўйилмаслиги ҳамда теримчиларга яратилган шарт-шароитни ўрганмоқда.

«Айни кунга қадар вилоятнинг Нишон, Ғузор ва Қарши туманларидаги пахта далаларида бўлиб, терим жараёнини кўрдик. Қарши туманида 285 нафар теримчи билан бирма-бир суҳбатлашиб, фикрини ўргандик. Мазкур туманлардаги ҳолатларни кўриб, ҳудудларда мажбурий меҳнатга йўл қўйилмаганига ишонч ҳосил қилдик. Шунингдек, вояга етмаганларнинг ҳам пахта даласига чиқиш ҳолатини кўрмадик», — деди ишчи гуруҳ таркибидаги мустақил блогер Ҳусан Комилжонов.

Ишчи гуруҳ раҳбари Шуҳрат Чўллиевнинг маълумот беришича, ушбу ҳудудларда теримчиларга яратилган шарт-шароитни кўнгилдагидек деб бўлмайди.

«Ушбу ҳудудларда мажбурий меҳнат кузатилмаса-да, мажбурий меҳнат билан ёнма-ён юрувчи ҳолатларни учратдик. Масалан, теримчиларнинг турар жойи гигиена талабларига жавоб бермаслиги ёки тоза ичимлик суви бўлмаган ҳолатларни ҳам кўряпмиз. Аммо мажбурий меҳнатнинг яққол кўриниши йўқ. Теримга келган теримчиларнинг аксарияти ўзи хоҳлаб теримга чиққан», — деди Шуҳрат Чўллиев.

Ишчи гуруҳ вакиллари журналист ва блогерлар билан суҳбати давомида кунлик ўрганиш натижалари ҳақида ОАВ вакилларига маълумот беришга, журналист ва блогерларга мажбурий меҳнат билан боғлиқ мурожаат тушганда дарҳол уларга хабар беришса, айбдорларга чора кўрилишини таъминлашга тайёрлигини маълум қилди.