Қашқадарёлик сенатор туман кенгаши депутатини саводсизликда айблади

Қашқадарё вилоятидан сайланган сенатор Абдураҳим Эркаев Халқ депутатлари Қарши туман кенгаши депутати Феруза Аҳмедовани саводсизликда айблади. Бу ҳақда Қарши шаҳридаги Журналистлар уйида бўлиб ўтган тадбирда маълум қилинди, дея хабар берди «Дарё» мухбири.

Маълумот берилишича, вилоятдаги Журналистлар уйида Олий Мажлис Сенатининг Суд-ҳуқуқ масалалари ва коррупцияга қарши курашиш қўмитаси раис ўринбосари Шуҳрат Чўллиев бошчилигидаги ишчи гуруҳ журналист ва блогерлар билан мажбурий меҳнат масалалари хусусида суҳбатлашган.

Тадбирда сўз олган Олий Мажлис Сенати аъзоси Абдураҳим Эркаев Қарши туман ҳокимлиги ва Sulton Tex Group ўртасидаги можарони эсга олиб, Қарши туман Маъмурий суди қарори Халқ депутатлари Қарши туман кенгашининг сессиясида муҳокамага қўйилгани ҳақидаги воқеага тўхталган.

«Кўпчилик фермерлар кластердан жабр кўрган экан. Халқ депутатлари Қарши туман кенгаши сессиясига иштирок этиб, кластерни ҳимоя қилмоқчи эдик. Аммо кластернинг ўзи айбдорлигини билдик», — деди сенатор Абдураҳим Эркаев.

Сенатор «Дарё» мухбирининг «Сенатор сифатида Халқ депутатлари Қарши туман кенгашининг сессиясида иштирок этиб, туман Кенгаши депутатлари билан биргаликда суд қарорини муҳокама қилганликларингизни қандай изоҳлайсиз. Суд қарорини депутат ва сенаторлар муҳокама қилиши қанчалик тўғри?» деган саволига «Ўша кунги сессияда суд қарори муҳокама қилинмаган» дея жавоб қайтарди ва депутат Феруза Аҳмедовани саводсизликда айблади.

«Бир опанинг саводсизлиги ва фаросатсизлиги билан айтилган гапи қолганларга соя ташламаслиги керак. Қолаверса, сессияда суд қарори муҳокама қилинмаган. Сессияда кластер ва фермерлар ўртасидаги муносабат муҳокама қилинганди. Туман ҳокимлиги ахборот хизмати ҳам бу ҳақда нотўғри маълумот тарқатган», — деди сенатор.

Эслатиб ўтамиз, Қарши туман ҳокимлиги ахборот хизматининг 2020 йил 13 июндаги хабарига кўра, Халқ депутатлари туман кенгашининг олтинчи чақириқ, ўнинчи сессиясида туман ҳокими Мақсуда Мустафоева бошчилигидаги депутатлар Sulton Tex Group иши бўйича Қарши туман Маъмурий суди қарорини муҳокама қилгани хабар берилганди. Сессияда, шунингдек, депутатлар журналистлар ва ижтимоий тармоқ фойдаланувчиларининг танобини тортиб қўйиш масаласини ҳам кўриб чиққани ёзилганди. Ҳокимлик ахборот хизмати кейинчалик мазкур хабардан айнан шу қисмини ўчирганди.

Депутат Феруза Аҳмедова эса уларга бу борада кўплаб мурожаатлар тушгани боис туман кенгаши депутатлари суд қарорини муҳокама қилишга ҳақли эканлигини билдириб, «Қарор қандай қилиб Ўзбекистон Республикаси номидан чиқар экан? Ўзимизнинг Қарши туман Маъмурий суди кўриб чиққан-ку», — деганди. Депутат Дилором Тилакова сессияда иштирок этган бўлса-да, сессия пайтида хонага кириб-чиқиб юргани учун масала моҳиятини унчалик ҳам тушунмаганини билдирганди.