Коронавирус қуршовида қолган «Ал-Ҳилол» ОЧЛ 6-тур ўйинини 9 футболчи билан бошлайди. Захирада эса фақат 2 дарвозабон қолди

Саудия Арабистонининг «Ал-Ҳилол» жамоаси Осиё Чемпионлар Лигаси 6-туридан олдин қийин ҳолатда қолди.

Жамоа гуруҳ босқичининг сўнгги туридан ўрин олган «Шабоб ал-Аҳли»га қарши ўйин учун 11 нафар ўйинга лаёқатли футболчи билан етиб келди. Уларнинг уч нафари дарвозабон ҳисобланади. Шу тариқа «Ал-Ҳилол» 6-тур доирасидаги баҳсни 9 нафар футболчи билан бошлайди. Икки дарвозабон эса захирада қолади.

«Ал-Ҳилол» Қатарда марказлашган тизимда ўтаётган мусобақанинг аввалиданоқ муаммоларга дуч келганди. Аввалига жамоанинг 3-4 нафар ўйинчиси коронавирус сабаб баҳсларда иштирок эта олмади. Кун сайин жамоадаги касалланганлар сони ортиб борди.

«Ал-Ҳилол» «Пахтакор»га қарши 4-тур ўйинида (0:0) ўнга яқин футболчиси хизматидан фойдалана олмади. Ўша баҳсда саудияликлар захира ўриндиғида бор-йўғи беш нафар ўйинчи бор эди.

Маълумот учун, ОФК ишлаб чиққан регламентга кўра, жамоалардан бири коронавирус сабаб ўйинда иштирок эта олмаса, ўша жамоа мусобақадан четлатилади. Шу сабаб, «Ал-Ҳилол» плей-офф масаласини ҳал қилиб қўйган бўлса-да, сўнгги тур ўйинида майдонга тушишга мажбур.

Учрашув 23 сентябрь куни 23:00 да бошланади.

Айни дамда «Пахтакор» B гуруҳида 8 очко билан 2-ўринда бормоқда. Биринчи поғонани эса 11 очкога эга «Ал-Ҳилол» эгаллаб турибди. «Ал-Аҳли» эса 7 очкога эга. «Шаҳр Ходро» бўлса, атиги 1 очко тўплаган.