Жиноят ишлари бўйича Қорақалпоғистон Республикаси Қораўзак туман суди раиси Муҳамметдин Ниетуллаев вафот этди. Бу ҳақда Ўзбекистон Олий суди томонидан маълум қилинди.
«Ўзбекистон Республикаси Олий суди жамоаси жиноят ишлари бўйича Қораўзак туман суди раиси Муҳамметдин Ниетуллаевнинг бевақт вафоти муносабати билан унинг оила аъзоларига чуқур таъзия изҳор этади», — дейилади Олий суд хабарида.
Олий суд Муҳамметдин Ниетуллаевнинг вафоти сабабини маълум қилмаган.
Аввалроқ Ўзбекистон мусулмонлари идораси матбуот хизмати Қашқадарё вилоятининг Яккабоғ тумани бош имом-хатиби Тоҳир домла Исматиллаев вафот этгани ҳақида хабар берилганди. Қўмита томонидан берилган хабарда имомнинг вафоти сабаби маълум қилинмаган.
Шунингдек, Ўзбекистон Молия вазирлиги ҳузуридаги Бюджетдан ташқари пенсия жамғармаси Маблағларни бошқариш ва пенсия, нафақалар тўлови мониторинги бўлими бошлиғи Миродил Қосимов вафот этгани ҳақида хабар берилди. Жамғарма томонидан маълум қилинишича, Қосимов жиддий касалликка қарши оғир курашдан сўнг 2020 йил 19 сентябрь куни вафот этган. У айнан қайси касаллик асоратлари оқибатида вафот этганига аниқлик киритилмаган.
Ўзбекистон Халқ таълими вазирлиги эса вазирликнинг масъул ходими Шуҳрат Расулов вафот этганини маълум қилди. Вазирлик дастлаб Шуҳрат Расулов сўнгги вақтларда коронавирус инфекциясидан шифохонада даволанаётганини маълум қилган, бироқ кейинроқ хабардан мазкур жумлани ўчириб ташлаган.
Эслатиб ўтамиз, Жиноят ишлари бўйича Тошкент вилоят суди судьяси Хайриддин Шермуҳамедов, Жиноят ишлари бўйича Андижон вилоят судининг судьяси Шавкатжон Шодмонов коронавирусдан вафот этгани ҳақида хабар берилган. Бироқ Соғлиқни сақлаш вазирлиги мазкур судьяларнинг коронавирус оқибатида вафот этгани юзасидан расмий хабар бермаган.
Изоҳ (0)