Ўзбекистон фуқаролигини олиш ва ундан чиқиш тўғрисидаги аризаларни онлайн тарзда қабул қилиш режалаштирилмоқда. Шу мақсадида «Э-Фуқаро» идоралараро маълумотлар базаси яратилган бўлиб, у 2020 йилнинг октябрь ойидан тўлиқ ишга туширилиши кутилмоқда. Бу ҳақда «Норма» хабар берди.
Маълум қилинишича, Вазирлар Маҳкамаси 16 сентябрь куни «Ўзбекистон Республикасининг фуқаролиги масалаларини кўриб чиқишда замонавий ахборот-коммуникация технологияларини татбиқ этиш бўйича қўшимча чора-тадбирлар тўғрисида»ги қарорни қабул қилди.
Қарорга мувофиқ, Ички ишлар вазирлиги, Ташқи ишлар вазирлиги, Ахборот технологиялари ва коммуникацияларини ривожлантириш вазирлиги, Адлия вазирлиги ҳамда Давлат хавфсизлик хизмати «Паспорт-виза» автоматлаштирилган ахборот тизими мажмуасини модернизация қилиш орқали «Э-Фуқаро» — Ўзбекистон Республикаси фуқаролиги масалаларига оид идоралараро маълумотлар базасини жорий этди.
Билдирилишича, «Э-Фуқаро» тизими асосида фуқароликни олиш учун аризаларни қабул қилиш ва кўриб чиқиш тартиблари автоматлаштирилади. Шунингдек, фуқароликни расмийлаштириш, фуқароликни тиклаш ва уни йўқотиш бўйича ягона маълумотлар базаси шакллантирилади.
Ўзбекистон фуқаролигига қабул қилиш, ундан чиқиш тўғрисидаги аризалар «Э-Фуқаро» тизими орқали реал вақт режимида қабул қилинади.
Шунингдек, 2021 йил 1 январга қадар Ўзбекистон ҳудудида фуқаролик масалалари бўйича мурожаатларни Ягона интерактив давлат хизматлари портали орқали бериш механизми жорий этилади. Хорижда доимий истиқомат қилаётган шахслар эса Ташқи ишлар вазирлиги сайтида жойлаштирилган интерактив консуллик хизмати орқали кейинчалик шахсан келиб мурожаат қилиш шартини инобатга олган ҳолда мурожаат қилиши мумкин.
Ҳукумат қарори иловасига кўра, фуқароликка қабул қилиш ёки ундан чиқиш учун аризаларни кўриб чиқиш муддати тўрт босқичдан иборат бўлиб, тахминан 45 кун давом этади ва «Э-Фуқаро» базасининг ўзи октябрь ойида тўлиқ ишга туширилади.
Эслатиб ўтамиз, Ўзбекистон Президенти Шавкат Мирзиёев 2020 йилнинг март ойида «Ўзбекистон Республикасининг фуқаролиги тўғрисида»ги қонунни имзолаганди. Қонунга мувофиқ, 1995 йил 1 январга қадар Ўзбекистон ҳудудига кириб келган ва доимий пропискадан ўтган, чет давлат фуқаролигини қабул қилмаган ҳамда мазкур қонун кучга киргунига қадар фуқаролиги бўлмаган шахс Ўзбекистон фуқароси деб тан олинади.
Изоҳ (0)