Pensiya jamg‘armasining 34 yoshli xodimi “jiddiy kasallikka qarshi og‘ir kurashdan so‘ng” vafot etdi
O‘zbekiston Moliya vazirligi huzuridagi Budjetdan tashqari pensiya jamg‘armasi Mablag‘larni boshqarish va pensiya, nafaqalar to‘lovi monitoringi bo‘limi boshlig‘i Mirodil Qosimov vafot etdi, deb xabar bermoqda jamg‘arma matbuot xizmati.
Qayd etilishicha, Qosimov jiddiy kasallikka qarshi og‘ir kurashdan so‘ng, 2020-yil 19-sentabr kuni vafot etgan. U aynan qaysi kasallik asoratlari oqibatida vafot etganiga aniqlik kiritilmagan.
Mirodil Qosimov 10 yildan ortiq vaqt mobaynida, jumladan, 2010—2015-yillar davomida Pensiya jamg‘armasining Toshkent viloyat boshqarmasida Mablag‘larni boshqarish va to‘lov monitoringi bo‘limida mutaxassis, keyinchalik bo‘lim boshlig‘i lavozimida ishlagan.
2015—2020 yillarda Pensiya jamg‘armasining ijro etuvchi apparatining Mablag‘larni boshqarish va pensiya, nafaqalar to‘lovi monitoringi bo‘lim boshlig‘i lavozimida faoliyat yuritgan.
Ma’lumot uchun, so‘nggi vaqtlarda turli davlat organlari matbuot xizmatlari tomonidan xodimlarning vafoti haqidagi ta’ziyanomalar ko‘plab e’lon qilinmoqda. Ularning ba’zilarida xodimning o‘limiga koronavirus infeksiyasi asoratlari sabab bo‘lgani ko‘rsatib o‘tilmoqda.
Sog‘liqni saqlash vazirligi tomonidan yuritilayotgan koronavirus statistikasiga ko‘ra, O‘zbekistonda hozirgacha 429 kishi COVID-19 oqibatida vafot etgan. Biroq “Daryo” yuritayotgan alohida hisob bo‘yicha, O‘zbekistonda koronavirus qurbonlari soni rasmiy statistikadagidan kamida 18 taga ko‘p.
Xususan, Sog‘liqni saqlash vazirligi statistikasidagi quyidagi o‘lim holatlari hisobga olinmagan:
- 9 va 15-iyul kunlari Olmaliq shahar shifoxonalarida vafot etgan ikki ayol;
- DXA Navoiy viloyati boshqarmasi xodimi Adhamjon Dehqonov;
- Madaniyat vazirligi xodimi Akmal Irisov;
- Chilonzor tumani SEOM bakteriologiya laboratoriyasi mudiri Marhabo Ahmedova;
- Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i Hakimbay Xalimov;
- Jinoyat ishlari bo‘yicha Toshkent viloyat sudi sudyasi Xayriddin Shermuhamedov;
- Samarqand viloyati Toyloq tumani prokurori Farhod Abduxoliqov;
- Innovatsion sog‘liqni saqlash milliy palatasi “Buyuk kelajak” kengashi eksperti Sanjar Jalolov;
- Berdaq nomidagi Qoraqalpoq davlat akademik musiqali teatri artisti Janabay Utepbergenov;
- O‘zbekistonda xizmat ko‘rsatgan san’at arbobi, “O‘zbekkino” milliy agentligi Badiiy kengashi a’zosi Anvar Ergashev;
- “O‘zmetkombinat” aksiyadorlik jamiyati boshqaruvi raisi Sergey Vyunenko;
- Qashqadaryo viloyatining Mirishkor tumani hokimi G‘ayrat Begaliyev;
- Shifokor Farrux Rustamov;
- Xorazm viloyati Qo‘shko‘pir tumani Favqulodda vaziyatlar bo‘limi boshlig‘i mayor Doniyor Jabborov;
- IIV podpolkovnigi Abdurahmon Pardiyev;
- Jinoyat ishlari bo‘yicha Andijon viloyat sudining sudyasi Shavkatjon Shodmonov;
- “Milliy tiklanish” demokratik partiyasi vakili, Xalq deputatlari Yashnobod tuman Kengashi deputati Dildora Umarova.
