Юзни муз бўлаги билан тозалаш энг қадимги ва самарали воситалардан биридир. Бу услубдан Мерилин Монро ва Марлен Дитрих унумли фойдаланган, аммо анча вақтгача косметологлар буни қабул қилмаган. Ҳозирги даврда эса музда ювиш амалиёти яна оммалашмоқда. Қандай қилиб муздан фойдаланиш жараёни ҳақида қуйида тўлиқ кўрсатма берилган.
Нима учун керак?
Албатта, ушбу жараён бир қанча афзалликларга эга. Муз бўлаги тун бўйи ҳосил бўлган кўз остидаги шиш, кўкариш ва халтачаларни бир зумда бартараф этади ва терини тетиклаштиради. Шунингдек, танани уйқудан уйғотади. Ушбу жараён қон оқимини рағбатлантиради, натижада юз терисининг ранги ёрқин ва силлиқ кўринишга эга бўлади. Бундан ташқари, мунтазам равишда муз билан ювиш тери ҳужайраларининг янгиланишига ёрдам беради, қаришни секинлаштиради ва ажинлар пайдо бўлишининг олдини олади.
Ундан қандай қилиб тўғри фойдаланиш керак?
Кўпроқ самарадорликка эришиш учун нафақат оддий тоза сув, балки турли хил фаол моддаларни ҳам музлатиш мумкин. Масалан, мойчечак ва узум уруғи ёғи ёки грейпфрут ва кўк чойни музлатиш мумкин. Агар тери жуда қуруқ бўлса, музлайдиган аралашмага крем ёки косметик мой қўшиш мумкин. Ёдда тутиш керак, ўсимлик таркибий қисмлари аллергияни қўзғатиши мумкин. Ушбу жараённи бошлашдан аввал юзнинг бироз қисмини муз бўлагида артиб кўриш керак. Агар тошма ёки қизариш юз бермаса, жараённи тўлиқ амалга ошириш тавсия этилади.
Қуйидаги кўрсатмада босқичма-босқич амалга ошириш керак бўлган тавсиялар мавжуд:
- Жараён терини тозалашдан бошланади. Юзни ювишда одатдаги ювиш гели ёки кўпикдан фойдаланиш мумкин. Агар бу иш тунда амалга оширилса, аввал пардоз яхшилаб ювилади.
- Иш лимфа тугунларини рағбатлантириш учун бўйин ва деколтедан массаж қилиш орқали бошланади.
- Бурун ва унга бўлган параллел чизиқдан айлана шаклда юқори ва пастга қараб ҳаракатланиш керак.
- Муз бўлагини бир жойда 2-3 сониядан кўпроқ ушлаб турмаслик ва кучли босимга йўл қўймаслик керак. Кўз атрофи янада юмшоқ айланиб чиқилади. Сабаби айнан кўз атрофи териси юзнинг қолган қисмига қараганда анча юмшоқ ва шикастланиши осон.
- Агар муз оддий сувдан ҳосил бўлган бўлса, жараён якунлангандан сўнг крем суриш тавсия этилади.
Афсуски, бундай уй шароитидаги парвариш ҳаммага ҳам тўғри келавермайди. Мутахассислар юзда ўзгариш аломати кўрина бошлаган сезгир тери эгаларига тажрибани ўтказмаслик тавсия қилади. Чунки бу терининг ҳолатига салбий таъсир ўтказиши мумкин. Шунингдек, ушбу ҳолат юзида ҳуснбузар ва бошқа яллиғланишлардан азоб чекаётганларга ҳам тегишли – бу ҳолда муз вазиятни янада кучайтириб юбориши мумкин.
Изоҳ (0)