Қўқондаги «Шедевр» чойхонасида 2020 йил 5 февраль куни кечаси безорилик ва одам ўлдиришга суиқасд қилиш жиноятлари содир этилган, ҳолат юзасидан 30 нафар шахсга нисбатан қамоққа олиш тарзида эҳтиёт чораси қўлланилганди.
ЎзАнинг хабар беришича, дастлабки тергов органи Жиноят кодексининг 105-моддаси (баданга қасддан ўртача оғир жароҳат етказиш), 277-моддаси (безорилик), 25-97-моддаси 2-қисми (жавобгарликни оғирлаштирадиган ҳолатларда қасддан одам ўлдиришга суиқасд қилиш), 248-моддаси 2 ва 3-қисмлари (қонунга хилоф тарзда ўқотар қуролини ўтказиш ва сақлаш) каби жиноят содир этган жами 37 нафар шахсга нисбатан айб эълон қилган.
Жиноят ишлари бўйича Фарғона вилояти судининг судьяси Раҳматжон Араповнинг маълум қилишича, иш очиқ суд мажлисида судланувчиларнинг 29 нафар адвокати иштирокида кўрилмоқда. Ҳозирда судланувчи ва жабрланувчиларнинг кўрсатувлари эшитилмоқда. Пандемия сабабли фуқароларнинг суд мажлисида иштирок этиши чекланган.
«Шундай бўлса-да, карантин қоидаларига риоя этган ҳолда фуқароларнинг очиқ суд мажлисида иштирок этишлари имкон даражасида таъминланмоқда. Кейинги суд мажлисларида судланувчилар билан бирга 60 дан зиёд гувоҳларнинг кўрсатувлари эшитилади. Иш юзасидан якуний қарор қачон чиқарилиши номаълум, лекин қонуний ва адолатли ҳукм қонунда белгиланган муддатда чиқарилади», — дейди Раҳматжон Арапов.
Изоҳ (0)