14 сентябрь куни 89 ёшли америкалик бизнесмен ва филантроп Чарльз (Чак) Фини ўзининг Atlantic Philanthropies хайрия ташкилотини ёпиш тўғрисидаги ҳужжатларни имзолади. Фини 38 йил давомида ишлаган ташкилот орқали ишлаб топган деярли барча маблағларини — 8 миллиард долларни хайрия йўлида сарфлаб юборди, деб хабар беради Meduza.
Чак Фини 1931 йилда Нью-Жерси штатидаги Элизабет шаҳарчасида, Америка—Ирландия оиласида дунёга келган. У Корея урушида ҳарбий-ҳаво кучларида хизмат қилган, шундан сўнг, фахрийлар имтиёзи бўйича Корнелл университетига ўқишга кирган. Ўқишни тугатиб, Фини 1956 йилда бизнес билан шуғулланган — АҚШ ҳарбий-денгиз кучларининг Атлантика флоти денгизчилари учун солиқ солинмайдиган алкогол маҳсулотларини сотган. Фини кемаларнинг кейинги тўхташ жойи ҳақида баъзида фоҳишалар орқали хабар топган.
Тез орада Фини ўз бизнесини кенгайтирган. У яна уч ҳамкорни ёнига олиб, Duty Free Shoppers божсиз савдо дўконлари тармоғини ривожлантиришни бошлаган. Бизнес 1964 йилда — Япония ўз фуқароларига яна хорижга чиқишга рухсат берганидан сўнг, кучли импулс олган (ушбу тақиқ Иккинчи жаҳон урушидан сўнг жорий этилганди). Duty Free Shoppers япониялик туристларга сигареталар, коньяк ва сумкалар сотиб, миллионлаб доллар ишлай бошлаган. Ишлар шу қадар яхши кетганидан, Фини ва унинг шериклари 1976 йилда Тинч океанидаги Сайпан оролида дўкон очган ва у ерда аэропорт қурган.
1988 йилда Forbes журнали Финини АҚШнинг энг бадавлат инсонлари қаторида 31-ўринга қўйиб, унинг бойлигини 1,3 миллиард долларга баҳолаган. Аслини олганда ушбу пуллар у вақтда бизнесменга тегишли бўлмаган. Бундан 4 йил олдин у Duty Free Shoppers’даги ўз улушини — 38,75 фоиз — Atlantic Philanthropies хайрия ташкилотига сотиб юборган. Активларнинг топширилиши овоза қилинмаган, бу ҳақда фақат унинг яқинлари хабардор бўлган, холос. Фини Atlantic Philanthropies орқали бирор лойиҳани қўллаб-қувватлаш орқали ўзини ошкор этиб қўймаган. Бизнесмен олдингидек ҳаёт кечиришни ва Duty Free Shoppers’ни бошқаришни давом этган. У пул топишни яхши кўрган, бироқ уни ишлатишга эҳтиёжи бўлмаган.
Бизнесмен Atlantic Philanthropies фақатгина Duty Free Shoppers’нинг даромадлари эвазига ишлаётганини яхши тушунган ва компаниянинг энг муваффақиятли йиллари ортда қолганини тахмин қилган. У бизнесдан чиқишни ўйлай бошлаган. 1997 йилда Фини ва унинг шериклари Duty Free Shoppers’даги ўз улушларини Бернар Арнонинг LVMH концернига сотиб юборган. Ўшанда Фини биринчи бор оммага ўзининг хайрия фаолияти тўғрисида маълум қилган. У буни компанияни сотишдан тушган даъво унинг аноним хайрияларини ошкор қилиши сабаб мажбурликдан амалга оширган. Ўша вақт келиб Atlantic Philanthropies 600 миллион долларни хайрия йўлида тарқатиб улгурган. Бу каби сирлилик учун Forbes журнали 2021 йилда уни хайрия Жеймс Бонди деб атаган.
Фини бутун бойлигини умри давомида тарқатишга қарор қилган. «Ўлганингдан кўра, тириклигингда тарқатиш анча қувончли», — дея унинг сўзларини келтиради Atlantic Philanthropies. Бизнесмен пулларини фикрича катта даромад келтириши мумкин бўлган йирик лойиҳаларга тиккан. Atlantic Philanthropies таълим ва илмий тадқиқотларга 3,7 миллирд доллар (буларнинг деярли ярим миллиарди Корнелл университетига), 870 миллион доллар — инсон ҳуқуқларини ҳимоя қилишга, 700 миллиондан ортиқ — соғлиқни сақлашга хайрия қилган. Ташкилот ЖАРда ОИТСга қарши кураш, АҚШда ўлим жазосини бекор қилиш, Ирландияда университетларни ривожлантиришга хайрия маблағларини йўнатирган. У жами 6500 та грант ажратган, сўнггиси — 2016 йилга тўғри келади.
Фини хайрияга ҳам худди бизнес каби ёндошган. Atlantic Philanthropies грант олувчилардан батафсил бизнес-режаларни ва сарфланган пуллар тўғрисида ҳисоботларни сўраб олган. Агарда лойиҳалар бир жойда қотиб қолса, молиялаштириш тўхтатилган. Инвестицияларнинг рентабеллигини ошириш учун Фини давлатни иштирок этишга таклиф этган. Масалан, 1997 йилда Фини Ирландия ҳукумати ўз университетларига 100 миллион доллар ажраца, у ҳам шунча маблағ ажратишга ваъда берган. Бу фойда берган. Фини ўзининг пулларига очилган биноларга исми ёзилган пешлавҳаларнинг илинишига рухсат бермаган, лойиҳага бошқа хайрия ташкилотларини жалб этишни маъқул кўрган.
Айнан Фини ҳозирги кунда энг машҳур хайриячилар ҳисобланувчи Уоррен Баффетт ва Microsoft асосчиси Билл Гейтсни илҳомлантириб, уларнинг 2010 йилда «Туҳфа қасамёди» ташаббусини амалга оширишга ундаган. Унга ўз маблағларининг катта қисмини хайрияга йўнатирувчи бадавлат инсонлар қўшилган. Айни вақтда «Туҳфа қасамёди»га бутун дунё бўйлаб 200 дан ортиқ миллионер ва миллиардерлар қўшилган.
2012 йилда Forbes’га берган интервьюсида Фини ўз бойлигини тахминан 2 миллион долларга баҳолаган — у ўз ва рафиқасининг яшиши учун айнан шунча маблағ ажратиб қўйган. Бизнесмен камтарона яшашга ўрганган: у бизнес-классда учмаган, шахсий машинасига эга бўлмаган ва оддий Casio соатларини тақиб юрган. Forbes 2018 йилда унинг Сан-Францискодаги уйининг квартираси деворига «8 миллиард долларни хайрияга сарфлаган Чак Фини табриклаймиз» табличкаси илиб қўйилганини кўрган.
Изоҳ (0)