Хорижда ишлаш истагидаги ўзбекистонлик эркакларнинг аксарияти МДҲ мамлакатларига, хотин-қизлар эса Туркия ва Бирлашган Араб Амирликларига йўл олмоқда. Бу ҳақда 16 сентябрь куни АОКАда Президентнинг «Хавфсиз, тартибли ва қонуний меҳнат миграцияси тизимини жорий этиш чора-тадбирлари тўғрисида»ги қарори ижросига бағишлаб ўтказилган матбуот анжуманида маълум қилинди.
Ташқи меҳнат миграцияси агентлиги бошқарма бошлиғи Азим Аҳмадовнинг таъкидлашича, Россия ва Қозоғистонда муҳожирлар, асосан, қурилиш соҳасида ишлагани туфайли бу мамлакатларда аёллар учун иш топишда қатор муаммолар туғилади.
«Ўзбекистон фуқароларининг хорижий давлатларга ишлаш учун чиқишлари осон ва қийинлик даражасига бўлинади. Маълум бир давлатлар борки, уларга кириб бориш учун ишчи виза талаблари мавжуд ҳамда у ерда ишлаш тартиб-қоидалари ҳам белгиланган. Шундай мамлакатлар борки, уларга бориш учун виза талаб этилмайди.
Бугунги кунда мигрантларнинг энг кўп қисми шу жиҳатларни инобатга олган ҳолда Қозоғистон ва Россия, яъни МДҲ давлатларига тўғри келмоқда. Бу бориш осонлиги, маълум бир вақтда Ўзбекистон ҳудудидан чиқиб кетиб, мазкур давлатларга эркин кириб бориши билан асосланади. Иккала мамлакатда, асосан, қурилиш соҳасида кўплаб фуқаролар ишлашини инобатга оладиган бўлсак, уларда эркаклар сони жуда юқори. Аёлларнинг иш топишида қатор қийинчиликлар юзага келади.
Таҳлилларга кўра, уй хўжалигида хизматчилик, энагалик ва бошқа касбларга талаб юқори бўлганлиги туфайли Туркия ҳамда БААда аёллар учун иш топиш ва ишга жойлашиш осон кечади», — дейди Азим Аҳмадов.
Изоҳ (0)