Чироқчида ИИБ ходимлари томонидан уриб ўлдирилгани айтилган 32 ёшли Юсуф Абдураҳмоновнинг турмуш ўртоғи Гўзал Абдиева суд ҳайъатидан судланувчилар — Нурбек Овлаев ҳамда Анвар Жонқобиловларни кечириб, суд залидан озод қилишни сўради. Бу ҳақда навбатдаги суд мажлисида қатнашган «Дарё» мухбири маълум қилди.
«Чироқчи воқеаси» айбдорлари ишини кўриб чиқаётган суд мажлиси 2020 йилнинг 16 сентябрь куни соат 15:00 да ўз ишини давом эттирган.
«Мен фақат буларнинг болаларини ўйлайман. Буларнинг ҳам аёллари бордир. Шуларни ўйлайман. Саккиз ой давомида зор қақшаб йиғладим. Ўзимдан ўтганини ўзим биламан. Шунинг учун бу кунларни душманимга ҳам раво кўрмайман. Кўзим олдига шуларнинг фарзандлари келяпти. Уларнинг дадам қачон келади, дадам қачон келади, деган гапи эшитиляпти. Менинг фарзандларим отасини йўқотди. Отасининг меҳрига зор бўлди. Лекин буларнинг фарзандлари отасини кутиб турибди. Ҳозир бу ерда буларнинг оналари қанчалар эзиляпти. Майли, мен Худога солдим, Худо кўрсатсин. Президентимиз қанчадан қанча инсонларни кечиряпти. Наҳотки, мен шу икки инсонни кечиролмасам», — деди марҳумнинг турмуш ўртоғи Гўзал Абдиева.
Гўзал Абдиева суд ҳайъатига судланувчиларни 50 йил муддатга қамаса ҳам эри тирилиб келмаслигини, шунинг учун уларни суд залидан озод қилишни сўради.
«Қалбимда оғриқ бор. Мени шу юкдан озод қилинг ва одилона ҳукм чиқаринг. Менинг фарзандларим етим бўлди. Энди буларнинг фарзандлари етим бўлмасин. Мен қийналганим етади. Буларнинг аёллари бошига ҳам менинг куним тушишини хоҳламайман — бу иккаласини ҳам суд залидан озод қилишингизни сўрайман. Майли, буларни чиқаринг, виждони қийналсин. Менинг елкамда оғир юк қолмасин фақат. Буларни чиқармасангиз, менинг виждоним қийналиб ўтади», — деди у.
Эслатиб ўтамиз, «Чироқчи воқеаси» айбдорлари иши Ўзбекистон Республикаси Олий суди судьяси К.Толлибоев раислигида, Ш.Эшимов котиблигида Жиноят ишлари бўйича Қашқадарё вилоят судида кўриб чиқилмоқда.
Навбатдаги суд мажлиси 2020 йил 17-сентябр куни соат 10:00 да давом эттирилади.
Мавзуга доир:
- «Сени ҳам, уни ҳам ўлдирамиз ва ишни бир парча қоғоз билан ёпиб юборамиз». Чироқчи ИИБда қийноққа солинган фуқаро ИИБ ходими таҳдиди ҳақида гапирди
- «ИИБ биносида вафот этган Юсуф Абдураҳмоновга чақирилган тез ёрдам бошқа исм-фамилияни айтиб чақирилган». Тез тиббий ёрдам шифокори судда гувоҳлик берди
- «Суд тортишувларга бой бўлмоқда, ўрни келганда қизишяпмиз. Аммо суд бунинг учун ҳеч кимга танбеҳ бермади». «Чироқчи воқеаси» айбдорларининг адвокатлари суд жараёни ҳақида гапирди
- «‘Противогазъдаги қон излари марҳум Юсуф Абдураҳмоновга тегишли бўлган». Давлат суд эксперти хулосаси маълум қилинди
- «Чироқчи воқеаси» бўйича судда гувоҳликка чақирилган ИИБ ходими ота-бола қийноққа солинган куни «противогаз» сўраб олинганини тан олди
Изоҳ (0)