Ўзбекистон ҳукумати Россияга кириши тақиқланган ёки айни вақтда ушбу мамлакат ҳудудида тақиққа тушишидан қўрқиб миграция хизматларидан яшириниб юрган юз минглаб ватандошларнинг амнистия қилинишига эришмоқчи. Бу ҳақда 16 сентябрь куни АОКАда бўлиб ўтган матбуот анжуманида Ташқи меҳнат миграцияси агентлиги бошлиғи биринчи ўринбосари Давлатназар Матрасулов маълум қилди, дея хабар бермоқда «Дарё» мухбири.
Бош вазир маслаҳатчиси Меҳриддин Хайриддинов бошчилигидаги Ўзбекистон делегацияси Президент Шавкат Мирзиёев топшириғига биноан хорижда меҳнат қилаётган ўзбекистонликларга муносиб шарт-шароитлар яратиш ва улар билан тизимли ишлаш бўйича чора-тадбирлар ижросини таъминлаш мақсадида 16—29 сентябрь кунлари Россияда бўлади. Ташриф чоғида Россия Ички ишлар вазирлиги вакиллари ҳам учрашув ўтказиш режалаштирилган.
Давлатназар Матрасуловнинг таъкидлашича, бўлажак учрашувда Россияга кириши тақиқланган ёки маҳаллий миграция қонунчилиги талабларини бузгани учун, ушбу мамлакат ҳудудидан чиқолмай, яшириниб юрган минглаб ўзбекистонликларни амнистия қилиш масаласи муҳокама қилиниши кўзда тутилган.
Россия ИИВ берган маълумотга кўра, ушбу давлатда тақиққа тушиб қолиш эҳтимолидан қочиб юрган, яъни рўйхатда турмаган 600 минг нафар фуқароларимиз бор. Ўтган йиллар давомида яна 421 минг нафар ўзбекистонлик тақиққа учрагани учун Ўзбекистонга қайтиб келган.Ташқи меҳнат миграцияси агентлиги бошлиғи биринчи ўринбосарининг қўшимча қилишича, агар амнистия эълон қилинадиган бўлса, Россиядаги ватандошлар жаримасиз, ҳеч қандай маъмурий жазо қўлланмаган ҳолда Ўзбекистонга қайтиб келиш ҳуқуқига эга бўлади.Россияга юборилган ишчи гуруҳимизнинг кун тартибидаги энг долзарб масалалардан бири — айнан мана шу фуқароларга амнистия эълон қилинишига эришиш ҳисобланади. Яъни 600 минг нафар яшириниб юрганларга ҳам, Ўзбекистонга қайтиб келган 421 минг нафарга ҳам амнистия эълон қилиш масаласи муҳокама қилинади.
Давлатназар Матрасулов, Ташқи меҳнат миграцияси агентлиги бошлиғи биринчи ўринбосари
«Шунингдек, тақиққа тушиб, Россияга кира олмай юрган 421 минг киши учун яна ушбу давлатга бориб ишлаш имконияти яратилади», — деди Давлатназар Матрасулов.
Изоҳ (0)