Жаҳон соғлиқни сақлаш ташкилотининг Европа минтақаси бўйича директори Ҳанс Клюгенинг маълум қилишича, коронавирусга қарши яратиладиган бўлажак вакцина пандемияга чек қўя олмайди ва аҳолининг барча қатлами учун бирдек самарали бўлмайди. Бу ҳақда «Korrespondent.net» хабар берди.

Фото: DPA

«Мен вакцина пандемияга чек қўяди, деган гапни доим эшитаман. Албатта, йўқ! Вакцинанинг барча аҳоли қатламига ёрдам беришини билмаймиз. Ҳозир биз унинг бир гуруҳга ёрдам беришини, иккинчисига эса ёрдам бермаслигини кўрсатадиган баъзи белгиларини кўрмоқдамиз. Пандемиянинг охири биз жамоат сифатида ушбу пандемия билан яшашни ўрганганимизда келади. Бу бизга боғлиқ», — деди Клюге.

Шунингдек, ЖССТ Европа мамлакатларида октябрь ойининг бошида коронавирус касаллигидан ўлим сонининг кўпайишини кутмоқда.

«Вазият янада мураккаблашмоқда. Октябрь ва ноябрь ойларида биз кўпроқ ўлимни кўришимиз мумкин», — деб қўшимча қилди Клюге.

Унинг сўзларига кўра, ўлим сонининг кўпайиши касалланиш сонининг кўпайиши билан боғлиқ бўлади.

Жонс Ҳопкинс университети маълумотларига кўра, бутун дунёда коронавирус инфекцияси билан касалланганлар сони 29 059 868 кишини ташкил қилмоқда. COVID-19 касаллиги оқибатида вафот этганлар сони эса 924 953 кишига етган. Дунё бўйича коронавирусга чалинганларнинг 19 652 377 нафари касалликдан тузалишга муваффақ бўлган.

Ўтган бир сутка ичида бутун дунёда коронавирус билан касалланганлар сони 307,9 минг кишига ошиб, янги суткалик рекорд қайд этилган