Тошкент вилояти Оҳангарон шаҳрида қоидабузарлиги учун тўхтатилган ва маъмурий баённома тузиш жараёнини тасвирга олаётган ҳайдовчига ўзини обрўсизлантирувчи хатти-ҳаракатлар қилган ЙПХ ходимига нисбатан хизмат текшируви тайинлангани ҳақида хабар берилганди.
Йўл ҳаракати хавфсизлиги бош бошқармаси хизмат текшируви хулосасига кўра, Ўзбекистон Республикаси Вазирлар Маҳкамасининг 2018 йил 1 декабрдаги 975-сон қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда ИИВнинг меъёрий буйруқ талабларини бузганлиги учун Тошкент вилояти ИИББ иккинчи минтақавий ҳудуд Оҳангарон шаҳар ИИБ Йўл ҳаракати хавфсизлиги бўлинмаси маъмурий ҳуқуқбузарлик материалларини кўриб чиқиш бўйича инспектори Д. Машкуров эгаллаб турган лавозимидан озод этилгани, унинг келгусида йўл ҳаракати хавфсизлиги билан боғлиқ бўлмаган лавозимга тайинланиши маълум қилинди.
Эслатиб ўтамиз, 9 сентябрда интернетда «Оҳангарондаги масхарабоз ГАИ!» сарлавҳаси остидаги видеолавҳа тарқалган.
Расмий маълумотга кўра, Тошкент вилояти Оҳангарон шаҳар ИИБ ЙҲХБ ЙПХ гуруҳи инспектори В.Қодирхонов 2 сентябрь куни Оҳангарон шаҳар Амир Темур кўчасида соат 20:10 да Cobalt ҳайдовчисини светофорнинг тақиқловчи ишорасига амал қилмасдан ҳаракатланиб келганлиги учун тўхтатган.
Ҳайдовчига нисбатан содир этган қоидабузарлиги юзасидан маъмурий баённома расмийлаштирилаётган вақтда И.А. мобил телефони орқали ҳолатни тасвирга олишни бошлаган.
Шу пайтда тунги хизматга жалб қилинган Оҳангарон шаҳар ИИБ ЙҲХБ Маъмурий ҳуқуқбузарлик материалларини кўриб чиқиш бўйича инспектори Д.Машкуров ички ишлар органлари ходимини обрўсизлантирувчи хатти-ҳаракатлар қилган. Ходимнинг бу хатти-ҳаракати ҳайдовчининг тасвирларига муҳрланганди.
ЙПХ ходимлари билан боғлиқ бу каби вазиятлар ҳақида бошқа хабарлар ҳам берилган. Жумладан, 5 сентябрда Тошкент вилоятида ЙПХ ходимига 2 миллион сўм пора бермоқчи бўлган ҳайдовчи қўлга тушгани, 7 сентябрда Самарқандда ЙПХ ходимининг қонуний талабларига бўйсунмаган 19 ёшли ҳайдовчи олти суткага қамалгани, 8 сентябрда Навоийда аёл киши ЙПХ ходимининг бодикамераси ва жезл таёқчасини олиб қўйгани, прокуратура ҳолат юзасидан суриштирув бошлагани хабар қилинган.
Изоҳ (0)