Адлия вазири ва журналистлар иштирокида жорий йилнинг 11 сентябрь куни вазирликда коррупцияга қарши кураш тизимининг яратилиши, унинг ўзига хос хусусиятлари ва эришилган натижаларга бағишланган матбуот анжумани ташкил этилди. Унда вазирлик, Коррупцияга қарши курашиш агентлиги, БМТРД Коррупцияга қарши курашиш глобал лойиҳаси ҳамда «СЕРТ International» с.р.о`нинг Ўзбекистондаги вакилллари ҳам қатнашди, дея хабар бермоқда «Дарё» мухбири.
Анжуманда адлия вазирлиги Ўзбекистонда давлат бошқарув органлари орасида биринчи бўлиб «Коррупцияга қарши курашиш менежмент тизими» бўйича ISO 37001:2016 халқаро стандарт сертификатини қўлга киритгани эълон қилинди.
Тадбирда адлия вазири Русланбек Давлетовнинг таъкидлашича, ISO 37001:2016 халқаро стандарт сертификати коррупция ҳолатларининг олдини олиш, аниқлаш, зарур чораларни кўриш ҳамда коррупция хавфини камайтиришга йўналтирилган мақбул ва аниқ мезонли чора-тадбирларни назарда тутади. Бу эса бир неча босқичдан иборат.
«Коррупцияга қарши курашиш стратегиясининг биринчи босқичи 2019 йилнинг 1-ярмида амалга оширилди. Бунда Адлия вазирлиги коррупция хавфлари ва фактларини, ходимларнинг ўз ваколатини суиистеъмол қилиши ёки зарур пайтда ҳаракатсизлиги ҳолатларини аниқлаш мақсадида кенг жамоатчиликни ёрдамга чақирди. Шу боис адлия органлари ва муассасаларида фуқароларга аудио ва видео ёзув воситаларидан фойдаланишга рухсат берилди. Жамоатчилик назорати эса ходимларнинг жавобгарлигини ошириш имконини яратди.
Шунингдек, вазирлик ҳузурида коррупцияга қарши кураш кенгаши ташкил этилди. Коррупция хавфига мойил бўлган вазифалар (ваколатлар) ва лавозимлар рўйхати шакллантирилди. Интернет тармоғида нотариуслар бўш иш ўринларига танловлар онлайн-транслясия қилиниши янгиликлардан бири бўлди. Бу орқали ходимларни саралаб олишнинг максимал шаффофлигига ва виждонли нотариусларни ишга тайинлашга эришилди.
Стратегиянинг иккинчи босқич 2019 йилнинг июль ойидан 2020 йилнинг август ойларида амалга оширилди. БМТ Тараққиёт дастури билан ҳамкорликда адлия органлари ва муассасаларида «КПМГ International» компаниясининг халқаро экспертларини жалб этган ҳолда, коррупцияга қарши комплаэнс назоратни жорий этиш бўйича лойиҳа амалга оширилди.
Ушбу лойиҳа доирасида вазирлик ва унинг муассасаларига юклатилган функцияларни бажаришда коррупция хатарлари хавфи даражаси (492) бўйича баҳоланди ва таснифланди.
Иккинчи навбатда, ISO 37001:2016 «Коррупцияга қарши курашиш менежмент тизими» халқаро стандарти асосида вазирликнинг ўндан зиёд ички ҳужжати тубдан янгиланди, вазирликда коррупцияга қарши курашиш бўлими ташкил этилди.
Учинчи навбатда, кўрилган чора-тадбирлар натижасида вазирлик тизимидаги барча йўналишдаги коррупциявий шарт-шароитларни минималлшатириш ҳисобига коррупция ҳуқуқбузарликлари ва жиноятлари минимал даражага туширилди. Ходимлар ўртасидаги коррупция жиноятларни энг кам даражага туширилди. Масалан, 2019 йилда адлия органлари ва муассасаларининг 6 нафар ходимига нисбатан жиноий жавобгарлик иши қўзғатилган бўлса, уларнинг 4 нафари коррупция жиноятлари бўйича ишлар бўлган.
Учинчи босқич 2020 йилнинг июнь август ойларида амалга оширилди. «СЕРТ International» с.р.с халқаро ташкилоти томонидан Адлия вазирлигининг коррупцияга қарши курашиш менежменти тизими ISO 37001:2016 «Коррупцияга қарши курашиш менежмент тизими» халқаро стандартига мувофиқлиги юзасидан сертификатлаш бўйича аудит ўтказилди. Натижада вазирликка ушбу сертификат берилди», деди Давлетов.
Адлия вазирининг айтишича, мазкур сертификат вазирликнинг барча вакили зиммасига катта масъулият юклайди.
«Агар эртага бизнинг бирор ходимимиз қонунбузарлик қилиб, коррупцияга қўл урса, ҳамма сертификат ҳақида гапиради. Шу боис сертификатнинг масъулиятини ҳис қилиб, ўз устимизда астойдил ишлашда давом этамиз. Бизда алоҳида комиссия, коррупцияга қарши кураш бўлими мавжуд ва улар кечаю кундуз коррупция масалалари билан шуғулланади, ҳар бир вазиятни таҳлил қилади ва ҳар йили аудит ўтказади», деди Русланбек Давлетов.
Изоҳ (0)