Қирғизистон Ўзбекистон билан мунтазам авиақатновни тиклайди

Ўзбекистон билан мунтазам авиарейсларни тиклаш бўйича ишлар олиб борилмоқда. Бу ҳақда Қирғизистон республика штабига таяниб «24.кг» хабар берди.

Аниқлик киритилишича, 14 сентябрдан бошлаб улар Тошкент—Бишкек—Тошкент йўналиши бўйича қатновлар амалга оширилади. Авиакомпаниялар ушбу йўналишда авиачипталар сотувини бошлади. Тошкентга парвозлар ҳафтада бир марта амалга оширилади.

Қирғизистон 17 сентябрдан бошлаб Қозоғистон билан ҳам авиапарвозларни тиклашни режалаштирган. Олмаота—Бишкек—Олмаота йўналиши бўйича парвозлар ҳафтасига икки марта амалга оширилади, кейинчалик уларнинг сони кўпаяди.

Аввалроқ Uzbekistan Airways 4 сентябрдан бешта давлат билан мунтазам халқаро авиапарвозларни тиклагани, улар орасида Қирғизистон ҳам борлиги хабар қилинганди.

1 сентябрдан Ўзбекистон ва Қирғизистон ўртасида автомобиль йўллари орқали кириш-чиқишга қўйилган чекловлар  бекор қилинди. Охирги 14 кун Қирғизистонда бўлиб турган ёки сўнгги 72 соат давомидаги коронавирус инфекциясига ПЗР тест текширувининг манфий натижалари тўғрисида маълумотномаси мавжуд бўлган шахслар Ўзбекистонга кириб келганда карантин назоратига олинмайди.