Тожикистон ўз аҳолисини таъминлаш учун Ўзбекистондан газ импорт қилишни кўпайтирмоқчи

Тожкистоннинг газ тақсимлаш компанияси Ўзбекистондан импорт қилинаётган газ билан мамлакат аҳолисини таъминлаш имкониятларини кўриб чиқмоқда. Бу ҳақда «Asia Plus» хабар берди.

Компания томонидан маълум қилинишича, биринчи навбатда Ўзбекистондан импорт қилинаётган газни Душанбе ва Хўжанд шаҳарлари аҳолисига етказиб бериш режалаштирилмоқда.

Аввалроқ «Душанбегаз» компанияси магистрал газ қувури ёнида жойлашган пойтахтдаги баъзи уйлар Ўзбекистон газини олаётганини маълум қилган. Гап шундаки, бундай уйларни қувурга улаш учун алоҳида харажат талаб қилинмаган.

Маълум қилинишича, айни пайтда сўнгги ўн йилликлар давомида эскирган инфратузилмани янгилаш ишлари олиб борилмоқда, шундан сўнг газдан бошқа истеъмолчилар ҳам фойдаланиши мумкин бўлади.

Компания томонидан қўшимча қилинишича, инфратузилмани янгилаш учун хавфсизлик масаласини ҳисобга олган ҳолда кўп харажат талаб қилинади, чунки Душанбедаги уйларда сўнгги ўн йилликда газ бўлмаган.

Тожикистоннинг шимолидаги аҳоли ва корхоналарни газ билан таъминловчи «Сомон-Сўғдгаз» компанияси 2020 йилнинг охиригача инфратузилмани тиклаш ишларини якунлаш режалаштирилаётганини маълум қилди. Шундан сўнг Хўжанд шаҳри, шунингдек, вилоятнинг бошқа шаҳарлари ва туманлари газ билан таъминланади.

Ўзбекистондан Тожикистонга газ етказиб бериш олти йиллик танаффусдан кейин 2018 йилнинг апрель ойида қайта тикланган.

Ўзбекистон газини Тожикистонга етказиб бериш 2019 йилда 2018 йилга қараганда 2,6 баробарга ёки 55 миллион кубометрдан 140 миллион кубометрга ошган. 2018 йилда Ўзбекистондан импорт қилинган газ қиймати 6,9 миллион долларни ташкил қилган бўлса, 2019 йилда унинг қиймати 17,7 миллион долларни ташкил қилган.

Ўзбекистон газининг асосий истеъмолчиси Тожикистон алюминий заводи ҳисобланади. Шунингдек, Ўзбекистон газини бошқа бир қатор компаниялар, жумладан, Душанбе ИЭС ҳам олади.

Ўзбекистон Энергетика вазирлигининг маълумотларига кўра, 2020 йилнинг саккиз ойида Тожикистон Ўзбекистондан 139,5 миллион кубометр газ олди. Тузилган шартномага кўра, 2020 йилнинг охиригача Тожикистонга 200 миллион кубометр табиий газ етказиб бериш режалаштирилмоқда.

2021 йилда Тожикистонга етказиб бериладиган Ўзбекистон газининг ҳажми ва нархи 28—29 сентябрь кунлари Душанбеда бўлиб ўтадиган навбатдаги ҳукуматлараро комиссия йиғилишида муҳокама қилинади.

Аввалроқ Ўзбекистон Россияга газ экспортини тўхтатгани, Хитойга экспорт уч баравар қисқаргани ҳақида хабар берилганди.