«Дарё»ни Telegram’да ўқинг! Join!
14:23, 10.09.2020 54009

Озодбек Назарбеков 7 млн доллар сарфланаётган «Мендирман Жалолиддин» сериали ижодкорлари билан учрашди (фото)

Ўзбекистон маданият вазири Озодбек Назарбеков «Мендирман Жалолиддин» сериалининг суратга олиш жараёнлари билан танишиш учун айни пайтда Туркияда бўлиб турибди. 9 сентябрь куни вазир сериал ижодкорлари билан учрашиб, суратга олиш жараёнларини кўздан кечирди.

Фото: Маданият вазирлиги матбуот хизмати

Қайд этилишича, тарихий сериални суратга олиш учун 50 гектар ер майдонида павильон ўрнатилган бўлиб, суратга олиш жараёнларига мингдан ортиқ ижодкор жалб этилган.

«Бугунги кунда асосий ролларни маҳорат билан ижро этаётган актёрлар от миниш ва қиличбозлик бўйича махсус тайёргарликдан ўтди. Шу билан бирга турк тилини мукаммал ўрганиб, тарих фани бўйича ҳам билимларини бойитди. Фильмнинг асосий қаҳрамонлари Султон Жалолиддин Мангуберди, Султон Аловуддин, Темур Малик, Туркон хотун, Чингизхон ва унинг фарзандлари образлари устида мукаммал ишланди. Ҳар бир актёрга ўша давр руҳиятига мос равишдаги либослар тикилди», — дейилади хабарда.

Фото: Маданият вазирлиги матбуот хизмати

«Дунё миқиёсидаги катта лойиҳага қўл урганимни чуқур ҳис қиляпман. Лойиҳани амалга ошириш осон эмас. Жуда катта тайёргарлик ва маҳорат керак. Аммо мен Жалолиддин тарихини яхши билар эдим. Бироқ фақат менинг билимим етарли эмас, жамоа, сценарий муаллифи, либослар дизейнери, тасвирчи, режиссёрлар ҳам хабардор бўлиши муҳим эди. Шу сабабли ҳам суратга олиш ишларидан аввал ижодкорларнинг барчасини Мангуберди тарихини чуқур ўрганишга ундадим. Менга ўзбек актёрларининг маҳоратига қандай баҳо берасиз деб кўп бора саволлар йўллашди. Шуни айта оламанки, улар энди дунё миқиёсидаги фильмларда ҳам рол ўйнашга тайёр. Шахсан ўзим кейинги фильмларимга ҳам айнан ўзбек актёрларини жалб этмоқчиман, чунки режалаштираётган сериалимиз Мирзо Улуғбек ҳақида бўлади», — дейди сериал режиссёри Меҳмет Бўздағ.

Фото: Маданият вазирлиги матбуот хизмати

Фото: Маданият вазирлиги матбуот хизмати

Хабарда айтилишича, маданият вазирлиги буюртмасига асосан суратга олинаётган «Мендирман Жалолиддин» сериали Ўзбекистон томонидан «Best organiser» МЧЖ ва Туркиянинг «Боздағ фильм» кинокомпанияси ўртасида тузилган шартномага биноан «Orient Финанс Банк» тижорат банки ҳомийлиги асосида амалга оширилмоқда. Мазкур сериалга 7 миллион АҚШ доллари сарфланмоқда.

Фото: Instagram / ozodbek_axmadovich

Октябрь ойининг иккинчи ярмида «Боздағ фильм» кинокомпанияси раҳбари Меҳмет Бўздағнинг Ўзбекистонга ташрифи кутилмоқда. Ташриф доирасида оммавий ахборот воситалари вакиллари учун матбуот анжумани ташкил этиш режалаштирилган. «Мендирман Жалолиддин» сериали 2021 йилнинг январь ойида катта экранларга чиқарилиши кўзда тутилган.

Эслатиб ўтамиз, сериалда бош қаҳрамон Жалолиддин Мангуберди ролини турк актёри Эмре Кивилжим ижро этмоқда. Шунингдек, бир қатор ўзбекистонлик актёр ва актрисалар Тоҳир Саидов, Жавоҳир Зокиров, Акбархўжа Расулов, Саида Раметова, Райҳон Уласенова, Раъно Шодиева, Феруза Норматова, Юлдуз Ражабоваларнинг ҳам рол ижро этиши кутилмоқда.

Сериалнинг илк мавсуми 13 қисмдан иборат.

Изоҳ қолдиришдан аввал, қоидалар билан танишиб олинг: http://dy.uz/sBU7c